Wat la u Dr DRL Nonglait u la rai ban ym pan tiket shuh hynrei nga te ngan ïaid beit shakhmat : P.T Sawkmie

Shillong, Nohprah 4 : Wat la u Dr D.R.L Nonglait uba dei u Professor ka NEHU Khasi Department u la pynbna ba un ym pan tiket shuh na ka UDP ne na kano kano ka party ha kane ka election MP ban long ha u snem ban wan namar ki dang don bun syrtap ki kam ba u hap ban pyndep khamtam ha ka jingïakhun ban pynrung ïa ka Ktien Khasi ha ka Khyrnit kaba Phra, hynrei na ka liang u bah P.T Sawkmie MLA ba rim uba long uwei na ki kyrtong ba pan tiket ban ïakhun ïa ka MP Election Lok Sabha na ka UDP u la kren shai ba un ym kynran dien satia hynrei un ïaid beit shakhmat ban pan tiket hynrei ka shong pat ha ka party ïano kan ai ne jied ban pynïakhun.
U Dr Nonglait u dei uwei uba la paw kyrteng bha kum u kyrtong ba pan tiket na ka UDP hynrei kat kum ka jingpynshai jongu u la pynpaw ba ki don ki nongïalam ka UDP kiba la tyrwa ïa ka kyrteng jongu ban long kum uwei na ki kyrtong ka UDP na ka liang jongu um pat pan hi ïa kata ka tiket. Hadien ba la dep ïakren bad ki nongïalam ka UDP bad u la dep ban pynpaw ba un pyrkhat sani bha namar ki dang don bun syrtap ki kam ba u dang dei ban pyndep, kumta hadien ba ula pyrkhat sani bha u la rai ban ym pan tiket shuh na ka UDP.
Lah ban pynkynmw ba kiba la paw kyrteng bha baroh shi katta nalor u Dr D.R L Nonglait ki dei u bah P.T Sawkmie MLA ba rim ka Mawlai bad u bah Robertjune Kharjarin President ba rim ka HYC. Hadien ba u Dr DRL Nonglait u la pynbna ba un ym pan tiket shuh kiba sah mynta ki dei sa tang kitei ki arngut.
Na ka liang u bah Sawkmie haba ïakren bad u nongthoh khubor u la ong “ Na ka liang jong nga ngan ym weng ïa ka kyrteng ban pan tiket hynrei ngan pdiang ïa ka rai jongka party ïano kan ai tiket”.