Shillong, Nailur 03: Ka kynhun Special Investigation Team (SIT) ka Tnad Pulit, kaba la thung ban tohkit ïa ki kam thombor ba jia ha ka rally thuk thuk ka KSU ha ka 19 tarik Nailar, kala kem sa ïa uwei u nongialam kane ka seng, kaba pynkot ïa ka jingkem sha ka san ngut.
U Superintendent of Police ka East Khasi Hills Bah Vivek Syiem haba ïakren bad ki nongthoh khubor ula ïathuh ba une u nongialam ba dang shu kem u dei u Samuel Kharbani jong ka KSU Nongmensong Unit.La kem ïa u ha ka sngi Palei hadien ka jingpynshisha ïa ka jingdonkti jong u ha ki kam thombor.
Arngut ki dkhot ka KSU na Nongmensong kila shah khot hajir sha Mawdiangdiang Police Station haba ïadei bad ka jingïakhih pyrshah ïa ka jingtei mandir hapoh ka phyllaw ka Ophis CBI.
Katba ka jingshim jingkynthoh ïa ki jingbatai (statement) jong ki ka dang iaid, ka SIT kala shong bishar ïa ka bynta jong ki ha ki kam thombor ba jia ha ka 19 tarik Nailar, ong u Bah Vivek.
“Hadien ba pynthikna haka por ba tohkit, ïa u Samuel Kharbani la kem noh da ki Pulit.Ki Pulit kim shym la lap eiei ïa ka jingdon bynta u Celestine Lyngdoh bad kumta la pynlait noh ïa u” ong u SP.
