Shillong, Nailur 02: Ka Federation of Khasi Jaintia and Garo People (FKJGP) kala kyrpad ïa u Chief Executive Officer jog ka Meghalaya Health Insurance Scheme (MHIS) ban peit lem ïa ki nongpang ki kynduh ban ioh ïa ka hok jong ki ha ka liang ka jingsumar lyngba ka MHIS
Katkum ka kyrwoh khubor na u President ka FKJGP u Bah Dundee Cliff Khongsit kaba nyngkong u la ai ka jingiaroh bad ka jingsngewnguh ïa ka tnad kaba pyntreikam ïa ka Meghalaya Health Insurance Scheme (MHIS) ha ka jylla jong ngi.
Ka MHIS ka la long ka jingkyrkhu bad ka jingiarap kaba khraw ïa bun ki longïing, khamtam eh ïa kito kiba wan na ki longïing kiba duna ka ioh ka kot, da kaba pynlah ïa ki ban ioh ïa ka jingsumar ha ki por ba ki pang ki shitom bad ha ki por jong ka jingeh.
Kum ka kynhun kaba shimkhia ïa ki jingeh kiba ki para nongshong shnong jong ngi ki kynduh, ngi ngeit skhem ba ka hok ban ioh ïa ka jingsumar kaba biang, kaba janai bad kaba tikna ka long ka hok ba kongsan jong u briew baroh, khlem da kheiñ la u briew u duk ne u riewspah.Baroh ki briew ki dei ban ioh ïa ka lad kaba ryngkat ban ioh ïa ka jingsumar kaba biang bad kaba ha ka por kaba dei.
Hynrei, ngi kwah ban pynsngew sha phi ïa ka jingeh kaba ki nongpang bad ki longïing kiba ia kynduh ia ki jingeh mynta, kaba iadei bad ka jingregister ïa ki MHIS Smart Card hadien ba la kut ki por treikam jong ki Facilitation Centre ha ki hospital.
Katkum ka jingtip kaba ngi ioh, ki hospital ki pynlong ïa ka jingregister ïa ki MHIS Smart Card tang ha ki por treikam ba la buh, kaba long kumba naduh ka por 9:30 mynstep haduh 6:00 janmiet.
Hynrei, ka jingpang bad ki jingjia ba kyrkieh ha ka liang ka koit ka khiah kim jia tang ha ki por treikam.Lada don u nongpang uba wan sha hospital bad uba donkam ban shah admit ne ban ioh ïa ka jingsumar kaba kyrkieh shabar jong kine ki por treikam, u nongpang u lah ban donkam mar mar ïa ki dawai, ki test bapher bapher bad kiwei pat ki jingsumar kiba donkam.Ha kum kine ki jingjia, u nongpang ne ka longïing jong u/ka ki hap ban siew na ka pla jong ki hi ïa kine ki jinglut.
Kane ka wanrah ïa ka jingeh kaba khraw, khamtam eh ïa ki nongpang bad ki longïing kiba wan na ki longïing kiba duna ka ioh ka kot.Ha ka por jong ka jingpang ne ka jingjia kaba kyrkieh, ym lah ban tip lypa ha kano ka por yn donkam ïa ka jingsumar.Ki jingjia kiba kyrkieh ki lah ban jia ha kano kano ka por bad ym tang ha ki por treikam jong ki Facilitation Centre kiba la buh ha ki hospital.
Namarkata, halor kine ki mat kiba la kdew haneng, ha ka kyrteng jong ka Federation of Khasi Jaintia and Garo People, ngi kyrpad da ka jingsngewrit ïa phi, kum u ophisar uba peit bad khmih ïa kane ka Tnad, ban sngewbha ban shimkhia ïa kane ka mat, ban bishar bniah ïa ka jingeh, bad, lada lah, ban wad ïa ki lad ki lynti kiba biang ban pynbeit bad ban weng ïa kane ka jingeh.
Ngi kyrpad ruh ba yn sngewbha ban pyrkhat ïa ka lad treikam kaba pynlah ïa ki nongpang, khamtam eh kito kiba wan na ki longïing kiba duna ka ioh ka kot, ban ioh ïa ki jingmyntoi bad ka jingpynlut ïa ka jingsumar hapoh ka MHIS watla ki donkam ïa ka jingsumar kaba kyrkieh shabar jong ki por treikam ba ju buh jong ki Facilitation Centre.
Ngi kyrmen skhem ba phin sngewbha ban shim ïa kane ka mat kum kawei na ki mat kiba donkam ban peit bniah bad ban shim ïa ki sienjam kiba donkam na ka bynta ka jingmyntoi, ka jingbit jingbiang bad ka bha ka miat jong ki paidbah ka jylla jong ngi.
