Shillong, ïaïong, 24: Tang hapoh ki lai bnai jong une u snem, ki shipai BSF kiba ap pahara ha khappud India-Bangladesh ki la ïoh kem 115 ngut ba kynthup ïa 78 ngut ki mynder Bangladeshi bad 37 ngut ki nong India kiba donkti ban khaii ïa ki mar ba la kheiñ be-aiñ na u pud u sam.
Ha u kyrwoh ba la phah da ka tnat shipai BSF, la pyntip ba ki shipai BSF ki la lah ban pynpulom ïa ki jingrung tuh bad ki jingshalan ïa ki mar be-aiñ ha khappud. Nalor kata, hynriew ngut ki briew kiba donkti ban long ki nongïalam lynti ïa ki mynder Bangladeshi ki la shah kem ha kaba la aiti noh sha ki bor Pulit ban pyngngat hapoh ki kyndon aiñ jong ka ri.
Ha kine ki lai bnai, ki shipai BSF kiba ap pahara ha khappud ka jylla Meghalaya, kiba la pynlong ïa ki jingkhynra bad ki jingap ktem ha ki bynta bapher bapher ki la ïoh kurup ïa ki mar khaii tuh bad ïa ki 750 tylli ki masi kiba shongdor antad kumba T. 11.70 klur. Ki mar ba ïoh kurup ki kynthup ïa ki dawai kuli Yaba, u Ganja, ka kiad, ki jingtah pynbhabriew, ki jaiñ bad kiwei kiwei ki jait tiar ba la thmu ban khaïi be-aiñ sha ka ri Bangladesh.
Nalor kaba ap pahara ïa ka khappud ki shipai BSF ki la phai khmat ruh ban ai jingïarap ïa ki paidbah nongshong shnong kiba shong basah ha khappud da kaba pynlong ïa ki jingsumar ei na ka por sha ka por, da kaba pynlong ïa ka jingai snam kaba 13 sien kynthih bad ka jingsam ïa ki tiar ba donkam sha ki shnong ki thaw.
Khnang ban pynthikna ïa ka jingïada ïa ka khappud, ki shipai BSF ki la ïatreilang ruh bad ki shipai Border Guards Bangladesh (BGB) da kaba pynlong ïa ki jingïalang ha ka kyrdan jong ki Commander khnang ban weng ïa ki jingïapher jingmut ha khappud, ban wanrah ïa ka jingshaniah, ban pyrkhing ïa ka jingrung tuh, ka jingkhaii tuh bad ïa ka ïaid ka ieng jong ki runar kiba thmu ban leh ïa ki kam pyntriem.
Ka tnat shipai BSF Meghalaya ka la pyntip ruh ba bun ki jingtip ba bniah ki la pynpaw pyrthei ha ka jingtohkit na ka jingïohkem ki mynder Bangladeshi bad ïa ki nongïalam lynti. Ïa ki jingtip ba bniah la ju ïasam bad ka tnat Pulit jong ka Sorkar Jylla bad kiwei kiwei ki tnat syntiat jong ka Sorkar Pdeng khnang ban pynlong ïa ka jingtohkit kaba bniah bad ban lap shuh shuh ïa ki buit rung be-aiñ bad ki buit treikam ha kylleng ka ri India.
Ïa ki jingphla jong ki nongïalam lynti bad ki nongkhaïi tuh la ju ai jingtip sha ki Pulit bad sha kiwei kiwei ki tnat syntiat na ka por sha k apor khnang ban ïakhun pyrshah ïa ka jingrung tuh bad ka jingkhaii tuh ha khapud Indo-Bangladesh ha Meghalaya.
Ki shipai BSF kiba ap pahara ha Meghalaya ki la pynpaw ïa ka jingkut jingmut ban peitngor bha ïa ka khappud, ban ïatreilang bad ban ïarap ïa ki shnong ki thaw kiba don ha khappud khnang ban tehlakam ïa ka jingkhaii tuh bad ki kam runar ruser ha shilynter jong ka khappud Indo-Bangladesh.
