Ha kane ka pyrthei kyrduh kam, ym dei ban lehraiñ ban trei ïa kano kano ka kam, ong ki samla

Shillong, Ïaïong 24: Kan long kaei kaei ka khubor kaba sngewtynnat bad kaba sngew sarong ban ïohi ba bun na ki samla Khasi mynta kim salia shuh ban trei ïa kano kano ka kam wat la ka dei ka kam ban hap sar surok ruh, ym kum mynshwa ba bun kim treh satia ïa kane ka kam, hynrei kaba sngewsih pat ka long ba ki briew kiba ïaid lynti pat ki dang bret ñuit pathar.
Halor kane haba u Mawphor u la ïoh ban ïakren bad katto katne ki samla kiba ju sar surok na Motphran sha Mawkhar bad Mission Compound ki la ong ba ha kane ka por kyrduh kam ym dei shuh ban leh raiñ bad ha kajuh ka por ki la kyrpad ïa ki paidbah ban ym bret ñuit pathar.
Kine ki arngut ki samla ba sah ha Mawlai bad kiba dang pyndep tang ïa ka matrik ki la pynpaw ba ki kmen ban trei ïa kane ka kam da kaba kyntu ruh ïa kiwei ki samla Khasi ba kim dei shuh ban lehraiñ haba trei kano kano ka kam.
Shuh kine ki samla Khasi kiba ju pynkhuid ïa ka Motphran shaduh Mawkhar nangta sha Mission Compound ki la pynpaw ïa ka jingkmen ba ki ïoh ban trei ïa kane ka kam namar ki la ïathuh ba ha ki por kiba mynshwa ki shu trei bylla katba ïoh kumta ki la ong ba da ka jingïoh ïa kane ka kam ka la long ka jingkyrkhu namar ka jingïoh ruh ka long kaba biang.
“Ha kine ki por kiba mynta bun na ki samla kiba wad kam hynrei kim ïoh bad dei namarba kane ka juk kaba mynta kadei ka juk kaba kyrduh kam kumta ngim dei ban salia shuh mynta ban trei ïa kano kano ka kam,” ong kitei ki arngut ki samla da kaba bynrap ruh ba wat kiba la pass ha ka jingpule PhD ki dang hap ñiah taxi kumta hap ban trei beit ïa kano kano ka kam.
Ki la pynpaw ruh ka jingbynñiaw ba dang bun na kiba ïaid ba ïeng na ki lynti ïaidkjat ba kim pat sngewthuh ïa ka jingdonkam ban long kiba lehkhuid bad haduh mynta ki dang ïaibteng ban bret pathar ïa ki jaboh jabaiñ.
“Lada ngi long kiba lehkhuid ngin ïoh ruh ïa ka met kaba koit kaba khiah bad ngi kyntu ruh ïa ki kmie ki kpa ba kin hikai ruh ïa la ki khun ba kin ym bret jaboh pathar hynrei ba kin bret ha ki jaka ba la buh ne ba kin bat beit ha la ki kti bad ban bret sha la ki jaka theh ñuit kiba don ha la ki jong ki ïing ki sem,” kyrpad kitei ki samla kiba pynkhuid ïa ka lynti ïaidkjat.
Lah ban pynkhymmaw ba ka Shillong Municipal Board ka la shim ïa ka sien jam kaba kham tyngeh ban pynïoh ïa ka Shillong kaba khuid da kaba ba thung shihun ki briew ban trei sngi ban pynkhuid ïa ki jaka kiba hap ha ka jingpeit jong Board.
Lahr uh ban ong ba mynta u bnai ka SMB ka la thung thymmai jan shispah ngut ki briew ban shu trei kontrak ban pynkhuid ïa ka sor Shillong ha ki jaka kiba hap hapoh jong ka jingpeit ka SMB, kane ka jingpynkhuid ka long khamtam eh ïa ki surok bad ki jaka ïew.
Ka Shillong Municipal Board mynta ka la bthah ïa ki nongtrei ba kin pynkhuid lai sien shi sngi ban pynthikna ba ki ki lynti syngkien bad ki surok khamtam eh ki sawdong sawkun ka Khyndailad bad ka Motphran, kine ki jaka ba don ki ïew kin long kiba khuid.
Haba u Mawphor u la ïoh ban ïakren bad kitei ki samla kiba ïoh ban trei ïa kane ka kam pynkhuid ki la ïathuh ba ki don kiba ïoh bynta ban pynkhuid ha kaba nyngkong kaba ki pynkhuid ka dei por 7.00. baje mynstep, kaba bynta kaba ar ka long 2.00 baje nohphai sngi bad ka bynta kaba lai ka long sdang 8.00 baje mynmiet bad ki pynkut ha ka por 10.00 baje mynmiet.