Shillong, Ïaïong 24: U Symbud Myntri Rangbah ka jylla u ba khmih ïa ka tnat ki Kam Pynroi Sor ka jylla u Bah Sniawbhalang Dhar ha ka sngi Palei u la kyntait war ba ka don ka jingpyndonkam bakla ïa ka pisa ha kaba pyntrei ïa ka Laitumkhrah Municipal Market redevelopment project (LMMRP).
Kane ka la wan hadien ba u nongwad RTI dang shen u la kyrpad ïa u Lat ka jylla u CH Vijayashankar bad ïa u Myntri Rangbah u Conrad K Sangma ban kyrpad ïa ka Central Bureau of Investigation (CBI) ban tohkit halor kane ka jingkynnoh ba pyndonkam bakla ïa ka pisa ha ka ban tei biang ïa ka project jong ka Laitumkhrah Municipal Market.
“Lada don mano mano ba wad RTI dei ban jubab ïa u. Lada u shem ba don ka jingbakla, u lah ban ïaid shakhmat halor kane ka kam, hynrei ka jingshisha hi ka long ba kam shym la don ka jingpyndonkam bakla ïa ka pisa,” ïathuh u Bah Dhar sha ki lad pathai khubor.
Katkum ka jingong jong u, kane ka project ka dang don hapdeng ka jingtei bad kan shym don ka jingkylli ba don ka jingpyndonkam bakla ïa ka pisa.
Halor ka jingkynnoh ba ka la don ka jingpynkiew ïa ka jinglut ban tei ïa kane ka project, u Bah Dhar u la ong ba kam bym la don ka jingujor na ki ophisar kaba la ïohpdiang da ma u halor kane ka kam.
Lah ban ong ba u RTI activist u Napoleon S Mawphniang u la kynnoh ba ka don ka jingpyndonkam bakla ïa ka pisa, ka jingpynkheiñ ïa ki rukom pynïaid kam, ka conflict of interest, bad ka jingbym bud ïa ka rukom pynïaid kam halor ka sawdong sawkun jong ka jingpyntrei ïa kane ka project.
U la kynnoh ruh ba ka don ka jingbam sap bad ka jingbakla ka jingpynïaid kam kaba la pynlong ban hap pynkiew haduh 36.8% jong ka jingpynlut ïa ka project bad ka jingpynslem ban pyndep mynta la palat 4 snem.
U la kyrpad ruh ba dei ban don ka jinglum jingkheiñ halor ka jingtei ka ba don jingïada jong kane ka project kaba dei ban leh da ka expert committee bad ban ïohbiang ïa ka jingsiew kaba la palat pud sha ki contractor.
Na ka liang u nongwad (activist) RTI u la ong ba ka jingshem na ka RTI ka pynpaw ba principal contractor, M/s Collinstar Sawkmie, u dei u kpa jong u Myntri ka tnat Sports & Youth Affairs u Bah Shakliar Warjri.
Haba kdew halor ka jingbym ïaid beit ka kam contract, u la ong ba ka project haba sdang la mang ha u bnai Ïaïong 2020 kaba long T. 25.73 klur hynrei naduh kane ka la kiew sha ka T. 35.21 klur lyngba ki jingleh revise kiba bun bad kumjuh ruh ki “adjustment.”
“Wat hadpeng ba ïa ka kam contract la ai ha u bnai Ïaïong 2020, ïa kane ka jaka trei ka aiti sha u contractor tang ha u bnai September 2021 – kaba la slem la kumba 17 bnai. Kane ka project, haba sdang la buh ban pyndep ha ki snem ba la leit hynrei ka la neh khlem lah ban pyndep haduh u bnai Ïa’ong 2025,” u la ong.
Ha kajuh ka por u nongwad RTI u la ong ba ka jingdonkti jong ka M/s Shrolenson Marbaniang, kaba ïasoh lang bad u chairman barim ka Meghalaya Government Construction Corporation, ka la nang pynskhem ba kumno ki riew saiñ pyrthei ki don bynta ban pynïaid ïa ki kam contract jong ka sorkar.
