Shillong, ïaïong, 24: Ki nongïalam jong ki hynñiew tylli ki shnong kiba don sawdong jong ka Nongkhyllem Wildlife Sanctuary ki la mih shakhmat ban pyrshah jur ïa ka Eco-Tourism Project kaba T. 23.6 klur ba la bei lyngba ka tnat Jngohkai Pyrthei ka Sorkar Jylla na ka bynta ban shna ïa ka ‘Resort, Skywalks, Water Sport Zone’ bad kiwei kiwei ki jingtei hapoh jong ka khlaw Nongkhyllem.
Ki nongïalam shnong bad ki Sordar Shnong na ka Umsohma, New Tasku, Umladoh bad Raid Sohkhwai ki la ïathuh ba kam shym la don kano kano ruh na ka liang jong ka Sokar Jylla ban ïasyllok bad ki bor pynïaid shnong shwa ban wanrah ïa kane ka projek hapoh ka khlaw. Dei halor kane ka nongrim ba kum ki nongïalam shnong kim lah satia ban pdiang ïa ka projek ba la tyrwa da ka tnat Jngohkai Pyrthei.
Ki la ong ruh ba lada ka project ka dei shabar jong ka khlaw bad lada ka Sorkar ka ïasyllok shwa bad ki lehse kan don ka jingai jingmut bad ka jingïasngewthuh jingmut lang. Hynrei ka jingleh lyndet bad jingbym burom jong ka Sorkar ïa ki nong shnong shnong jong ka thaiñ ki pynpaw ïa ka jingsngewsih bad ka jingpyrshah kaba jur ïa ka project.
‘Ngi kyrshan pura ïa ka Green-Tech Foundation halor kane ka mat namarba kim shym la pyrshah ne khang ïa ka roi ka par. Hynrei ngi dei ban tip ba ka khlaw Nongkhyllem ym tang ba ka dei ka Wildlife Sanctuary hynrei ka dei ruh ka ‘Eco-sensitive Zone’ bad ka ‘Protected Forest’, ka iing jong ki phew tylli ki mrad bad ki spah tylli ki jait kynbat. Kumno yn shu leit pyndik ïa ka iing ka sem ki mrad khamtam kiba lah jan duh jait. Nalorkata ha ri-lum Khasi-Jaiñtia ngi don satang ar tylli ki Wildlife Sanctuaries ba kynthup ïa ka Narpuh Wildlife Sanctuary bad ka Nongkhyllem Wildlife Sanctuary. Kumno yn shu kwah pynjot jubor noh ïa kine ki ar tylli. Shaei ki mrad kiba la jan duhjait napoh ka Jylla kin leit,” la bynrap ki nongïalam shnong.
‘Ngi kyntu ïa ka sorkar bad ker noh da ka kynroh ïa ka Nongkhyllem Wildlife Sanctuary lada ka Sorkar ka don pisa hynrei ym ban shna ïa ki jingtei hapoh jong ka khlaw ba kyntang,” la bynrap shuh shuh ki Sordar Shnong ha ka jingïalang.
