SHILLONG, Lber 20: Ar ngut ki khynnah ïalehkai jong ka PFR Football Academy, kata u Habankara Blah uba hap ha ka kyrdan U-13 bad u Mebanpynshngain Khyriem uba hap ha ka kyrdan U-15, ki la shah jied ban mihkhmat ïaka Punjab FC haka lympung ïalehkai U-13 Sub Junior bad U-15 Junior Elite League jong ka AIFF.
Kine ki ar ngut ki la shah jied dei hadien ba ki la lah ban pyndonkam hok ïa ka sap jong ki ha jingïalehkai pyrshang jied khynnah ïalehkai lane ka Trial bala pynlong daka Punjab FC ha Shillong.
Khyndiat, haba phai sha ka Punjab FC, ka long kawei naki Club ba pawnam jong ka ri bad kaba ïalehkai ruh ha kawei na ki lympung ba heh tam hapoh ka ri, kata ka Indian Super League (ISL).
Lah ban kdew hangne ba ka jingshah jied jong kine ki ar ngut ki khynnah ban don bynta bad katei ka Club ba pawnam jong ka ri, ka long ruh kum ka jingai mynsiem ïa kiwei pat ki khynnah jong kane ka jylla ba kin trei shitom khnang ban poi sha kane ka thong.
Na ka liang jong ka Academy ka kyrmen skhem ba kine ki khynnah kin lah ban ïalehkai bha haka Sub Junior bad Junior League ka ban sa long shen jong ka AIFF. Kumjuh ruh ka Academy ryngkat ki kmie ki kpa jong kine ki khynnah, ki ai ka jingkhublei kaba kyrpang ïa ki Coach kata ka Kong Nylla Mary Wahlang bad i Sir Jo kiba la trei shitom ban saiñdur ïaka rukom ïalehkai jong kitei ki khynnah.
“Kum ki kmie ki kpa Ngi ïohi shisha ïa ka jingtrei shitom jong kitei ki Coach jong ka PFR bad Ngi shem bun bah ki khynnah jong kane ka Academy ki kiew shisha haka rukom ïalehkai ka jong ki lyngba ka jinghikai jong ki Coach bad ngi shem ruh haba don kino2 ki trial kaba la khot daki Club kiba heh jong kane ka ri, ki khynnah jong ka PFR bunsien ki juh shah jied beit bad poi sha ka thong” la pynpaw ki kmie ki kpa jong kitei ki khynnah da kaba bynrap ba ki dap da ka jingsngew nguh ïaka jing trei shitom jong ki Coach jong kane ka Academy.
