Shillong, Lber 20 : U Bah John F Kharshiing uba dei u Working President jong ka Meghalaya State Olympic Association (MSOA) u la shah jied ha ka National Rifle Association of India (NRAI) ban long u dkhot jong ka Organizing Committee jong ka World Championships jong ka International Shooting Sports Federation (ISSF) kaban sdang ha Bhopal, Madhya Pradesh, naduh ka 21 tarik haduh ka 27 tarik Lber 2023.
Ïa u Bah John F Kharshiing ha ryngkat kiwei pat la pdiang sngewbha ha ka sngi Nyngkong ha ka jingpoi jong ki ha ka kad liengsuiñ ha Bhopal da ka Dr. S Shrivastav kaba dei ka Assistant Director, jong ka tnad Sports ka Sorkar Madhya Pradesh kynthup ki heh NRAI bad ki longheh ka MP Rifles Association.
Ka ISSF World Cup Rifle/Pistol ha Bhopal, kaban long naduh 20-27 tarik Lber, kan sa ïohi ïa ka jingshim bynta jong 198 ki nongïasiat na kylleng ka pyrthei kynthup ki nongïasiat kiba kynsai kiba paw bad kiba la jop Olympic bad kiba khur takma ha ki rynsan ïalehkai jong ka pyrthei.
Ki ri kiba ïashim bynta kin phah mar 37 ngut ki nongïasiat, ka Ri India bad Ri China kin phah bun ngut ki nongïashim bynta. Ka Denmark, Switzerland, USA, Korea, France bad Germany ki long ki Ri kiba paw ha kaba ki nongïasiat jong ki la khmih lynti ba kin leh bha.
Haduh mynta ki team na palat 30 tylli ki Ri ki la poi bad kiwei pat kin dang poi ha ka miet sngi Nyngkong. Ki jingïalehkai ïasiat kin sdang ha u ka 22 tarik Lber, katba ka sngi plie pyrda ïa katei ka lympung kan long ha ka 21 tarik Lber 2023.
