San snem hadien ba katto katne ngut ki MLA ka liang pyrshah kata ka Kong Ampareen Lyngdoh, MLA Congress ha katei ka por , u Bah Adelbert Nongrum, MLA ka KHNAM bad kiwei kiwei ki la pynpaw ka jingpyrshah ïa ka jingkren lamphrang da u Lat ha ka snem 2018, u Ganga Prasad, ha ka sngi ba sdang ka dorbar mang tyngka jong ka ïingdorbar thawaiñ kaba thymmai, ki saw ngut ki MLA ka Seng VPP ki la pynpaw syndon da ka kam bad kata ka long ban pynpaw pyrshah syndon hapoh ïingdorbar bad mih noh ruh khlem sngap shuh ïa ka jingkren jong u Lat ba mynta, u Phagu Chauhan.
Ki kyndon jong ka Meghalaya Legislative Assembly ki ong ba ki dkhot ki lah ban kren da ka ktien ba ithuh ne ka official language kata ka ktien phareng ne ka ktien synrop lang jong ka jylla ne ka associate official language kata ka ktien Khasi bad Garo.
Mar syn sdang kren u Lat, u nongïalam ka VPP, u Bah Ardent Miller Basaïawmoit, u la ïeng ban pynpaw ka jingpyrshah ban ong ha u Lamphang ka ïingdorbar ba ka Meghalaya kam dei ka jylla kaba kren Hindi. U Bah Ardent u la ong ruh ba ka kyndon pynïaid ïingdorbar ki kala kren shai ba ki jingiakren hapoh ka Iingdorbar Thaw Ain ka dei ban long da ka ktien phareng.
U Nongïalam ka VPP, ula ong ruh ba kane ka jingphah ka Sorkar Pdeng da u Lat u ba kren beit da ka Hindi bad u bym nang kren phareng, kadei ka jingibeiñ bad ka jingbym kheiñ snep ïa ki nongshong shnong ka jylla Meghalaya, kaba kiba bun ki nang ne sngewthuh ïa ka ktien Hindi.
Kane ka jingkren Hindi jong u Lat Ganga Prasad ha ka snem 2018 bad jong Phagu Chauhan ha u 2023, ka la jia ha ka por ba ka jylla ka dang jur ka jingangnud bad ka jingdawa ban ithuh noh ïa ka Ktien Khasi bad Garo ha kum kawei na ki Ktien ban ïoh rung ha ka Khyrnit ba Phra jong ka Riti Synshar ka ri India.
Ym tip kaei ka jingmut jong ka sorkar pdeng ba kan phah da ki Lat ki bym nang kren phareng sha kane ka jylla kaba kiba bun ki briew ki kham sngewthuh ïa ka ktien Phareng bad ïa ka Hindi. Ha ki snem kiba la leit kiba bun hi ki Lat ba wan shane kidei kiba nang ban kren phareng. Hato kane kadei ka jingthmu ban pyntian jubor ïa ka ktien Hindi ha kane ka jylla?.
Hynrei kumba la pynkynmaw da u Bah Ardent ha ka por ba u pyrshah ïa ka jingkren u Lat ha ïingdorbar ba dei ka jingthmu jong ka sorkar Assam ban pynrung da ka bor ïa ka ktien Assamese ha kiwei pat ki thaiñ jong ka thaiñ shatei lammihngi ba ka la mih ka jingïakhih ban ïoh la ki jong ki jylla kynthup ruh ïa ka United Khasi Jaiñtia Hills bad Garo Hills tad haduh ban da ïoh la ka jong ka jylla Meghalaya ha u snem 1972.
Ka jingpyrshah ban pyntian jubor ïa ka ktien Hindi kam dei tang kane ka thaiñ Shatei Lammihngi, hynrei ka jingpyrshah ka mih ruh na ki jylla ka ri India ba shaphang shathie kum ka Kerela, ka Tamilnadu bad kiwei kiwei.
Wat lada ka Hindi kadei ka ktien pdeng jong kiba bun ki jylla ka ri India, khamtam ki jylla sha ri thor, hynrei kadei ka ri pat kaba bun ki jait ktien kiba ki briwe ha la ki jong ki jong ki kolshor ki kren bad kadei ruh ak jingpynriewspah bad ka jingsarong ïa ka ri hi baroh kawei.
Kumta kane ka jingpyrshah ka VPP hapoh ïingdorbar kadei ban pynkyndit thiah ïa ka ri India ba kadei ban burom ruh ïa ki jait ktien kiba kren ha la jong ki jylla da ki jaidbynriew bapher bapher jong ka ri India, lym kumta ka ri India baroh kawei kan khih tang na ka daw ba ka sorkar pdeng ba ïalam da ka BJP ka kwah ban pynkren Hindi jubor ïa baroh ki nong India.
