Shah ïuhroit ka longbriew man briew jong ki paidbah ha ka jingshah thied vote ha ki MLA : D.L.Rymbai

0

Khliehriat Risaw 13: U bah Damewanhi.L.Rymbai, uba dei uwei na ki kyrtong uban ïa ai reng na ka 6-Khliehriat Constituency ha kane ka election MLA ka ban wan ha u snem 2023, u la pynpaw shai sha ki paidbah ba ka jingshah thied vote ki paidbah jong ka constituency ha ki MLA ka long ka jingïuhroit ïa ka hok longbriew man briew
Ha ka jingïalang kaba la pynlong ha ka shnong Lumshken, u bah Damewanhi Rymbai u la ong ba “Ka bynta kaba ha khmat eh kaba ngan buh, hato balei ngi jynjar, balei ki paidbah kim lah shuh ban pynbit pynbiang ïa ki jingdonkam ha ki iing ki sem, ka daw ka dei namar ka jingbym don shuh ka kam ka jam ka ba biang ban trei ban ktah, ngi kiba rit ba ria lada ngi trei ngin shah kem pynban, katba ki heh spah kiba trei bad kamai da ki klur ki klur hato phi ju ioh sngew ba kin shah kem, ym ju sngew ba kin shah kem, ki heh ki haiñ ki ïoh jingmyntoi na kane ka spah ka phew kaba ngi don hangne, te kane ka wanrah ïa ka jinghiar ha ka khaïi ka pateng, khamtam ha kane ka shnong Lumshken, nga tip bha ba phim ïoh jingmyntoi eiei na ka kam dewïong, namar hangne ha Lumshken la tip kum kawei na ki jaka ban rep ban riang, kaba kamai ja da ka rep, da kaba ri jingri, da kaba trei sha khlaw, hooid kiba don ki par ki trei dewïong hynrei ka kam dewïong kam dei ka kam ba kongsan ha shnong Lumshken, ha kaba mynta kane ka shnong ka la don mynta ha ka map kum kawei na ki shnong kaba pynmih symbai sniang, kaba ka tnat sorkar kaba peit ïa ki kam ri jingri ka dang ïa ksaid tyngeh halor kumno ban kyntiew ïa kane ka kam ri jing ri ha shnong Lumshken”
U la kren ruh da kaba sngew khia ba ka thaiñ ka ïoh ïa ki nongmihkhmat ki bym shym la peit lem ban kyntiew ïa kane ka kam ri jingri ha kane ka shnong Lumshken, kaba long ka kam ba kongsan ha shnong ha thaw, u la ong ba ka jingdon ki seng longkmie, ka jingdon ki Self Help Group, ka jingdon ki VO, ka jingdon ki Committee bapher bapher lyngba kine ki dei ki lad ban kyntiew ïa ka iohkam iohjam, bad ka ïoh ka kot.
U la kren ruh halor ka jingeh ha kaba ïadei bad ka jingïoh bor ding electrict, u la ong ba kiba bun ki shnong bunsien haba sniew ka machine transformer, da ki bun taïew, da ki bun bnai ki paidbah ki hap ban shong dum bad ka shnong hi ka hap ban kit khia ban leit wad ki lad ki lynti ban ïoh transformer, u la kynthoh ruh ba ka ophis MeECL ha ka district ka dei ka tnat kaba tlot bha ha kaba ai ka jingshakri ïa ki paidbah ka district “Hooid kam dei ka kam jong u nongmihkhmat ban ai bor ding, hynrei ki nongmihkhmat dei ban ai jingmut bad ai hukum ïa ka tnat ba kin peit ïa ki jingduna ha ki shnong ki thaw.
“Ha kaba ïadei bad ka jingbym biang ka um bam um dih, ha kane ka shnong Lumshken ka um bam um dih ka long kaba kordit bha, haba peit ïa kane ka skim JJM jong ka sorkar pdeng kaba thmu ban pyn poi um ha man la ki thliew ïing hynrei ha kane ka shnong bun bah ki shnong ki bym pat shym la ïoh um ha ïing, u myntri uba leit shim ïa ka khusnam sha Delhi, u la ong ba ha jylla Meghalaya baroh ki la ïoh um ha ïing, hato kane kam dei mo ka thok ka jler? Kane ka dei namar ba ki dei ki nongmihkhmat kiba shu thied kumba thied blang, thied sniang ïa ki nong thep vote, na kata ka daw ki shu ïuhroit ïa ka hok longbriew man briew jong ngi”
U la kren ruh halor ka jingbym treikam ki jaka ai jingsumar ha ka constituency bad ong ba ka don tang kawei ka sub centre ha shnong Iapmala ha kaba ki paidbah naduh ki shnong ba jngai kum na Suchen, Lumshken, Deiñshalalu, Wahsarang, Shiliang Unshong bad kiwei kiwei ki hap ha kane ka Sub Centre, ha ka jingshisha katkum ka jingbun briew ka la i dei ban ïoh noh kawei ka Sub Centre hangne ha Lumshken, katba ka Sub Centre kaba don ha Iapmala la dei ban kyntiew noh sha ka PHC, hynrei haba peit ïa ka jingshah ieh beiñ ki shnong ha kane ka sorkar, nga lap ba ym don ei ei ka ban kyntiew, haba peit sha kiwei kiwei ki constituency kiba ïoh ïa ki nongmihkhmat kiba don ka bor ban ïasaid ban pynioh ïa ki jingmyntoi ki paidbah, ki don ka jingkiew bad jing kyntiew, hynrei haba phai kum sha kane ka Khliehriat CHC ka dei pynban kaba hiar sha trai eh ha kaba ïadei bad ka rukom ai jingsumar”
Haba kren sha ki long kmie, u la ong ba “Haba peit sha kane ka sorkar mynta ka buh jingma bha ïa ki kynthei kiba kha ba pun kumno kin mareh shaduh shnong Iapmala ban wad dawai, ban phah injek, ka long kaba eh, ki Sub Centre kim dei ban don tang ki nurse, nga ngan nym shah ban kan long kumto, haduh ki Sub Centre level dei ban don ki doctor, namar mynta bun kiba la pass doctor da ki hajar ngut hynrei ki shu shnong namar bym ïoh kam ïoh jam, hato balei ka sorkar kam phah ïa ki sha kine ki Sub Centre, ki PHC ban kham pynbha ïa ka jingai jingsumar ïa ki paidbah”
U la kren ruh halor ka jingbym biang ki surok, ki lynti ki syngkien kiba ju buh jingeh ïa kiba pang ba shitom bad ka surok ka long ruh kum u budlum jong ka roi ka kiew ha ki shnong bad ha ka thaiñ bad ka jingroi ki shnong bunsien dei na ki skim shi spah sngi, ym dei kiba ïoh na ki nongmihkhmat, namar kine ki nongmihkhmat kim don bor ban peit namar ba ki kheiñ ba kane ka election kam donkam eh ban trei ha baroh ki snem, namar ki la dep ïohi ïa ka jinglong ki briew, ka pyrkhat pyrdaiñ (mind set) jong ki paidbah ba ka dang long kaba suk eh ban thied ban die bad ki pyrkhat ba ki dang lah beit ban shu pynbiej bad ialam bakla ïa ki paidbah”
Kumta u bah Dame u kyntu jur ïa ki paidbah ba ki dei ban long kiba skhem jingmut ba kim dei ban shah die ne shah thied namar ïoh kan lam sha ka jingshah ïuhroit ki hok jong ki paidbah.

Leave A Reply

Your email address will not be published.