Da ka song pisa synñiang ka KSU sha ki ar ngut ki nongïakhun kti na Ri Bhoi ba mihkhmat ïa ka India sha Turkey

Nongpoh, Risaw 13: Kum shi bynta ban ai mynsiem bad ruh ban pynpaw ïa ka jingsngewsarong ïa ki ar ngut ki samla na Ri Bhoi kiba la ioh ban mihkhmat ïa ka India sha ka 43rd World Arm Wrestling championship kaba long ha ka ri Turkey, ka Khasi Student Union, North Khasi Hills District Unit mynta ka sngi ka la noh synñiang da ka song pisa sha ki ar ngut ki nongïakhun kti (Arm Wrestlers) kiba dei na Ri Bhoi District.
Kane ka World Arm Wrestling championship ka dei ka lympung ïakhun kti ka ban sdang naduh ka 14 tarik u Risaw haduh ka 23 tarik u Risaw ha ri Tyrkey bad na Ri Bhoi District ki don ar ngut ki nongïakhun kti ba la paw kiba kynthup ïa ka Kong Margret Pathaw na Umsning bad u Samla Banshanlang Terang na ka Shnong Umlakhar ha Ri Bhoi District, ha kaba kine ki ar ngut ki mih khmat ïa ka Team na India sha katei ka lympung ïakhun kti jong ka pyrthei.
Na ka liang ka KSU, North Khasi Hills District Unit, ha ka jingïalam u Samla Lambok Rymbai kum u Vice president lem bad ki dkhot ki la kynduh ïa kine ki ar ngut ki nongïakhun kti ba paw bad kum ka jingai mynsiem ki la pynbud ruh da ka song pisa kaba long shi bynta ban kyrshan lem ïa ki ha ka jingleit shim bynta ha katei ka jingïakhun kti jong ka pyrthei ka ban long ha Ri Turkey.
U Samla Lambok Rymbai u la ai ruh ka kyntien ai khublie bad ka jingkitbok kitrwiang ba kine ki ar ngut kiba la leit ban shim bynta sha katei ka lympung ïakhun kti ha Turkey ba kin leh bha bad kum ka seng ka kyrmen skhem ruh ba kine ki ar ngut kin wan rah burom ïa ka Ri Bhoi District bad ka jylla hi baroh kawei da kaba kin sa ioh khur ïa ka nam jop na katei ka lympung ïakhun kti ka pyrthei ka ban long ha Turkey.
Na ka liang ka Kong Margret Pathaw ruh ka la ai khublie kyrpang ïa ka KSU, North Khasi Hill District Unit bad baroh ki seng bhalang bad ki paidbah kiba la kyrshan ïa ki halor kane ka jingleit shim bynta sha Turkey bad ki kyrmen skhem ruh ba kin buh ha ki jingduwai khnang ba kin lah ban ioh khur ïa ka nam jop ha katei ka lympung.