Nongstoiñ, Nailar 20: Ki paidbah nongrep ki dei ki rishot ba skhem ha ka ban kyntiew ïa ka ïoh ka kot, ka kamai kajih bad ban pyndap ïa ki jingdonkam hapoh ka jylla. Hynrei, na ka daw jong ka jingkylla jong ka suiñ bneng, ka mariang bad ka jingnang ring sdot jong ka khyndew kumta katba nang rep nang syrdep.
Ha kine ki 15 snem kiba la leit noh, ka sorkar ka la ju pynshlur ïa ki nongrep ba kin pynkylla noh ïa ka rukom rep bad ban pyrshang ruh da kiwei pat ki jait symbai. Hynrei ki nongrep pat ki ïakynduh jingeh namar kim lah ban ïoh ïa kiwei pat ki jait symbai, lada ka sorkar kam thaw ki lad ban pynpoi sha ki lyngba ki tnad treikam kiba dei peit ïa ka rep ka riang.
Bun bah ki nongrep kiba shong ha ki nongkyndong lei lei, wat tang ïa ki ophis kiba dei peit ïa ka rep ka riang kum ka Agriculture bad Horticulture Department kim tip haei ki don. Kawei pat ka jingeh ba ki paidbah ki ïakynduh ka long namar ba ki nongtrei ha ki ophis kiba peit ïa ka rep ka riang ki duna palat ha kaba ki paidbah nongrep kim ju ïoh satia ïa ki jinghikai lane ki jingpynshai paidbah ha ki shnong ki thaw. Kumta kumno tip ban kyntiew ïa ka rep ka riang bad kumno ban pyndonkam ïa ki symbai ban rep katkum ki aïom kiba biang.
Kiba bun bah kiba ap khmih lynti kam sorkar, hynrei namar ka jingbym ïoh kam sorkar bun ki shu im khlem kam khlem jam. Kito pat kiba phai sha ka kam rep ki la pynpaw ïa ka jingsngewkhia kaba jur halor kiba bun ki jingeh ba kum ki nongrep ki ïakynduh.
Ki don ruh ki nongrep kiba hadien ba ka sorkar ka la pynbna paidbah ba kan pyntreikam ïa kawei ka mission ban rep ïa uwei u jait jingthung u ba la tip kum u “Jatropha” bad na u symbai jong u lah ban shna Diesel bad Petrol. Kumta ki la don kiba la pyrshang ban thung, hynrei suki suki ka shu jah rngai khlem poi shaei shaei ruh.
Nangta kawei pat ka mission ka dei ka “Agar Mission” kaba la wan ban plie da u Dr.Mukul Sangma ha phyllaw jong ka ophis Horticulture ha Nongstoiñ ha u snem 2013 ha ka por ba u dang long kum u Myntri Rangbah. La khmih lynti ba katei ka mission kan treikam bha namar lada thung ïa kitei ki jait dieng Agar, ka long ruh kum ka jingpyn jyrngam ïa ka mariang. Hynrei katei ka mission ruh ka shu jah klep shano ruh ym don ba tip.
Ki don ruh kiwei pat ki mission kiba thymmai jong ka sorkar kum ka “Aqua mission” kaba ki briew kiba ïoh jingïarap na katei ka mission, ki dei tang kito kiba lah ban pynïadei bad ki ophisar jong katei ka tnad. La ong ba haba wat lada kim don jaka wat tang kat kawei ka pung tong um ruh, hynrei ka jingïarap ban shna pung dohkha ki ïoh beit.
