Ka Ktien Khasi bad Garo kum ki Official Language ka Jylla nalor ka English, rai ka Kynhun Myntri

By Mawphor Editor On Apr 17, 2026

Shillong, Ïaiong 16 : Ka jingïalang jong ka Kynhun Myntri ha ka sngi Palei ka la mynjur ba naduh mynta ka Ktien Khasi bad Garo nalor ka English kin dei noh ki Official Language jong ka Jylla ha baroh ki kam.
Haba pyntip ïa kane hadien ka jingïalang jong ka Kynhun Myntri, u Myntri Rangbah ka Jylla Conrad K Sangma u la ong ba ka Kynhun Myntri ka la mynjur ïa ka Meghalaya Official Languages Ordinance, 2026, bad pynduh noh ïa ka Meghalaya State Language Act, 2005, ban pynlong ïa ka Ktien Khasi bad Garo kum ki Official Language jong ka Jylla nalor ka ktien English.
“Kane ka rai ba kongsan kan wanrah ka jingkylla kaba khraw ha ka jingtreikam bad kan long ruh ka jingkyrkhu ïa ki samla ka jylla nalor ba kan ïarap ruh ban kyntiew shuh shuh ïa ki ktien tynrai jongngi,” u la ong.
“Kumta, mynta hapoh kane ka Meghalaya Official Languages Ordinance 2026 ba thymmai, ka jingmut hi ka long ba nalor ka ktien English, ka Ktien Khasi bad Garo kin long noh ki Ktien kiba ngi lah ban pyndonkam ha ka jylla,” u la ong.
Katkum ka jingong jong u, da kane ka sienjam ba ka sorkar jylla ka shim kan plie lad ban pyndonkam noh ïa ka Ktien Khasi bad Garo nalor ka English ha ki ophis treikam bad wat ha ka synshar khadar.
“Da kane ka sienjam, kan plie lad ruh ba ïa ka Ktien Khasi bad Garo ban pyndonkam ha bun ki jingtreikam ha ka sorkar.”
Nalorkata, u ong ruh ba kane kan plie lad wat ïa ki nongmihkhmat paidbah ba kin kren bad ïatai ha Iing Dorbar Thawain ka jylla da ka Ktien Khasi bad Garo nalor ka English ha kapor ba don ka Dorbar.
U Myntri Rangbah u la ong ruh ba kane ka rai kan poi ruh wat haba ïadei bad ki eksam ïakhun kam kiba pher bapher ha ka jylla nalor ka ktien English kaba mut ba ki samla ïakhun kam ki lah wat ban thoh eksam kam da ka ktien Khasi bad Garo.
Da kaba pyntip pat ba kane kan ym lah ban urlong noh mynta mynta, u Myntri Rangbah u la ïathuh ba ka jingpynkhreh kan dang shimpor haduh ban da dep pura.
U Conrad u ong ruh ba kane ka long ruh kumba ïaid ryngkat ryngkat bad ka jingïakhun jong ka jylla ban ïoh jingithuh noh ïa ka Ktien Khasi bad Garo ha ka Khyrnit kaba Phra jong ka Riti Synshar jong ka Ri namar kan long ruh kum ka khubor kaba khlain bha sha ka sorkar India.