Na Nongstoiñ sdang ka VPP ban pynithuh ïa u Dr.Batskhem, kyrtong MP ha ka elekshon shiteng samoi MP

Nongstoiñ, Ïaiong 16: Ki nongïalam ba hakhmat eh jong ka Voice of the Peoples Party ha ka sngi palei jong ka taiew, ki la hiar sha Nongstoiñ na ka bynta ban pynithuh paidbah ïa u Dr Batskhem Myrboh u kyrtong ba ka party ka la jied na ka bynta ka MP bye elekshon.
Ka party ka la jied nyngkong eh ïa ka Nongstoiñ Constituency ban pynithuh paidbah ïa u kyrtong Dr Batskhem Marboh, ha kaba ki nongkitkam ba hakhmat eh jong ka naduh u President rangbah Bah Ardent Miller Basaïawmoit, Dr K.Sen, Bah Golden Nonglong ba pynïaid ïa ka jingïalang, nangta kiwei kiwei de ki nongkitkam ba hakhmat ka party ki la don ryngkat, kynthup ïa ki MDC jong ka Mawthadraishan Bah Powell Sohkhlet bad MDC Nongstoiñ Dr Juristman Ïawphniaw, ki nongkitkam jong ka Women Wing bad Youth Wing lem bad ki nongkyrshan na Nongstoiñ.
Ïa ka jingïalang pynithuh paidbah la pynlong hakhmat jong ka New Nongstoiñ Market Complex, ha kaba ki nongïalam ba hakhmat duh kata naduh u Bah Ardent Miller Basaïawmoit bad kumjuh ruh u Dr Batskhem Myrboh kyrtong MP, ki la ai ïa ki jingkren pynshai sha ki paidbah.
La sakhi ruh ïa ki hajar ngut ki paidbah kiba tang mar syn ïoh sngew bad ïohi ïa ka sur bad ki lama jong ka VPP, ki la ïa tuid kham shakhmat iew Nongstoiñ, ban sngap bad shah skhor ïa kaei kaba ki nongïalam ki la pynshai bad ai jingkren ha kane ka sngi.
U Bah Ardent haba ai jingkren u la ong, “Hadien ka jingkhlad ba kyndit noh jong I MP I Dr Ricky AJ Syngkon, ngi la dap da ka jingsngewkhia bad ka jingktah mynsiem jur, namar ngi la duh noh ïa u radbah u ba ka party ka la sei ban ïa tynrong lem ïa ka khia ka shon hapoh ka jaidbynriew. Hynrei, ngi phai bad ngi shaniah ha ka jingïalam ka jong u Blei, namar ngi tip ba u Blei u don ïa la ka jong ka plan haba u pynjia ïa kiei kiei, watla ngi sngew ba ka long kaba kthang ha ka jingim jong ngi”.
“Hadien ba ngi la rai ba ngin leit shakhmat ban ïaid sha ki shnong ki thaw, ngi la sngew dei ban wan nyngkong eh hangne ha Nongstoiñ, namar ngi sngewthuh ïa ka jingkyrshan kaba khlaiñ kaba ngi ïoh na ki nongshong shnong ha ka Nongstoiñ Constituency. Ka jingkyrshan kaba la pynlyngngoh ïa ka ri baroh kawei namar jan baroh hi ha ka MDC elekshon, ki kren ba ka VPP kan hiar arsut sha Nongstoiñ tang na ka daw ka rai tiket sha u kyrtong shwa ka elekshon”.
“Ngi sngew dei ban sdang nangne ban pynithuh ïa u kyrtong MP jong ngi, kaba long kum ka dak ka jingsngewnguh bad sngew burom, ïa ka jingieit jingshaniah ba ngi la ïoh na ki nongshong shnong ka Nongstoiñ Constituency. Ngi la jop don burom nangne haduh 8 hajar tam ha ka MDC elekshon bad kane ka mih na ka jingshaniah ba ka VPP ka ïoh na ki paidbah ba ieit jong ka Nongstoiñ”, ong u Bah Ardent.
“Haba ngi peit ïa ka jinglong jingman ha ka ri kaba ieit jong ngi, ka don ka daw bad jingdawa kaba khraw ba ngi dei ban seng ïa kane ka party kaba thymmai bad kaba kham pher. Ai nguh ïa u Blei ba ha ki khyndïat snem jong ka jingïaid lynti ban pynshai paidbah ïa ki nongrim, ngi la lah ban sei saw ngut ki MLA, ngi la jop don burom ha ka MP elekshon bad kumjuh ruh ha ka MDC elekshon kaba la jop haduh 32 seat”.
“Nga pynkynmaw biang ruh ba ka jingsneng jong ngi ïa ka VPP kam shym dei eh tang ban ïaleh elekshon. Hynrei ngi seng ruh ban pynkylla ïa ka jingmut jingpyrkhat jong ki paidbah, kata ban wanrah ïa ka rukom pyrkhat kaba biang kaba shemphang kaba ïohi jngai, kaba pyrkhat ïa ka lashai lashisngi jong ki khun ki kti ki jong ngi, ym ban kamai spah. Ym shym la seng ban pynthame, hynrei ka kamram ka long ban ïalam bad ai jinghikai ha kiba kum kine ki jingïalang, ban pynskhem shuh shuh ïa ki jingmut jingpyrkhat bad ban khyllie ruh ïa kiwei ki bym pat sngewthuh haduh mynta ïa ka thong kaba shai bad ba don jingkyrmen jong ka VPP”.
“Ha ka jingïaid lynti bun kiwei pat ki party ki la kren kynthoh ba ka VPP kan ym lah ban suhthied sha Garo Hills, hynrei kynmaw ba ym shym la seng ïa ka VPP tang ha Khasi Jaiñtia hynrei shaduh Garo Hills, namar ka dei ka seng saiñ pyrthei riewlum hapoh la ka jylla, wat na ka ECI ruh ngi la ïoh ïa ka jingithuh kaba skhem. Dang shen ngi la hiar sha Garo Hills bad kaei kaba ngi shem ka long kaba ki paidbah Garo ki thrang dik dik bad ki phaikhmat sha ka VPP”.
“Ka thong jong ngi ki nongïalam bad jong baroh ki paidbah nongshong shnong ka Jylla ka long ban poi sha ka thong ha u 2028. Hooid ngi la jop ïa ka MLA elekshon saw ngut, ngi la synshar ïa ka District Council khlem ïatreilang bad no bad no. Hynrei kaba kongsan ka long ka jingjop ïa ka elekshon MLA bad ngin pyni kumno ngi treikam hapoh ki san snem ba ngi ïoh ban bat ïa u lakam synshar”.
“Ngi donkam ïa ka jingïatreilang jong baroh ban ai ka kti kamon ka kti kadiang naduh mynta ter ter. Ngin pynjop don burom ïa I Dr Batskhem Myrboh kyrtong MP bye elekshon, nangta ngin ïaid ryngkat ban poi sha ka thong kumba ngi thmu ha u 2028. Kum ki nongïalam ïa kaei kaba ngi kren ngi pynpaw hakhmat ki paidbah, ngin ïakhun dohïap ban poi sha kawei ka thong kaba ngi angnud bad kata ka long, ban ai ïa ka lawei kaba shngaiñ ïa ki khun ki kti ki jong ngi.Ban ïada ïa kane ka ri ka jong ngi bad ban pynkhlaiñ ïa ka ri ka jong ngi”, u la ong.
U Dr Batskhem Myrboh haba ai jingkren u la ong, “Ka jingsnohkti jong ka bad ka VPP kam shym mut ban ïaleh elekshon hynrei ban ai ka kti kamon kti kadiang bad kine ki rangbah kiba don shisha kata ka mynsiem ban shakri da ka lynti kaba beit na ka bynta ka ri bad ka jaidbynriew.Hynrei, kane kaba pynlong ïa nga ban mih ban ïaleh ïa ka elekshon, nga ngeit ka dei ka jingpynïaid jong u Blei watla ngam thmu ban ïaleh elekshon. Nga pyndem ïalade ha ka jingpynïaid jong ka party watla ha ka jingshisha nga jied ban long tang u nongtrei barit hapoh ka party”.
U la ong ruh, “Ka VPP ka skhem ha ka nongrim bad kata ka long ka synshar khaddar kaba khuid, kaba lehse ha ri India hi ym pat don kum kane ka party, ban ong ba hap sam pisa ha ka por elekshon. Hadien ka elekshon bun kim peit satia ïa ki paidbah hynrei ban treikam tang ban pynmyntoi ïa ki katto katne.Kane ka dei kaba ngam lah shah ban peit bad haba I Bah Ardent I khot ïa nga ban seng ïa ka VPP, nga long u ba la kloi ban ïatreilang”.
“Ha ka VPP ngin ym leh kino kino ki kam kiba wanrah ïa ka jingduhnong ïa ka jaidbynriew jong ngi.Ngin ym ïa peiñ ïa ka ri bad kiwei pat, hynrei ngi hap ban ïada ïa ka khyndew ka shyiap, ïa ka rukom im jong ngi, ka ïoh kam ïoh jam ki khun samla jong ngi. Kum u kyrtong ba ka party ka pynmih, ngan ïai im sngi ban ïaid ryngkat bad kine ki nongrim bad ban pynrung bad shna ïa ki lynti treikam ki ban ai jingmyntoi ïa ngi hi”.
“Ha ka jylla jong ngi, ngi donkam ïa ka bor synshar kaba khuid kaba beit na ka bynta u luk u lak bad ki paidbah salonsar. Ha kine ki sngi ngi dang sakhi ïa ka jingshah thngan jong ki samla ban pyrshah ïa ki rukom treikam jong ka sorkar. Ngi donkam ïa ka sorkar kaba treikam na ka bynta ki trai shnong kiba rit kiba ria”.
“I Dr Ricky Syngkon u ba la long u MP jong ngi, I la trei shitom na ka bynta ki paidbah. Ha ka jingshisha ngi la donbok shibun ba ngi la ïoh ïa I kum u MP u ba ki paidbah na Nongstoiñ hi ki la ai jingkyrshan kaba pura. Kumta nga sngew dei ban ai khublei ïa phi ki paidbah kiba la ai ka burom bad ki paidbah hi ki da kmen bad ong ba kim ju ïoh kum une u MP. Nga ngeit skhem ba phin ai ka jingkyrshan ïa ngi bad haba ngan long u MP u ban mih khmat na ka bynta ka ri Khasi Jaiñtia, ngan ïaid buddien ïa ki kam kiba I Dr Ricky I la iehnoh ban pyndep”, ong u Dr Myrboh.