Jowai, Ïaïong 15: Ha ka thong jong ka Rani Laxmibai Atma Raksha Prashikshan mynta u bnai Ïaïong, 2026, ka ophis treikam jong ka District Mission Coordinator, SSA West Jaiñtia Hills ka la sdang ban pynlong ïa ka jingai jinghikai ïa ki khynnah kynthei ha ki skul shaphang kumno ban long kiba la pynkhreh bad tip ban ïada ïalade na ki riew shim kabu ne ki damok.
Kane ka jingai jinghikai kan long lai bnai lynter (April-June) tang na ka bynta ki skul ba la dep jied kyrpang kiba don ha ki kyrdan Upper Primary bad Secondary Level.
Kat kum ba la bthah na ka Ministry of Education, Govt. of India ïa kane ka jingai jinghikai la bynshet ha ka West Jaiñtia Hills Karate Do Association, Jowai kaba dei kawei na ki shlem ai jinghikai balah ban leh ïa kane ka kam na ka bynta ka jingmyntoi ki khynnah kynthei.
Ki dkhot ka WJHKA kiba la dep pyntbit ïalade ban shimti ban pynïaid beit ïa kane ka kam hapoh ka District ki kynhup ïa u Na O Mankiwi War Passah (2nd Dan Blackbelt), u Ribait O Pde (1st Dan Blackbelt) ha ryngkat ka jingsynranlang u Patsha Chyrmang bad kiwei ki dkhot ka WJHKA.
