Jowai, Ïaïong 16: Ka ophis jong ka District AYUSH Society, West Jaiñtia Hills kala rakhe ïaka World Homeopathy Day mynta ka sngi 16 tarik ha District Library Auditorium, Mynthong, Jowai halor ka phang “Homeopathy for Sustainable Health.”
Na ka liang ka Additional Deputy Commissioner ka B. Blah kala long kum ka kongsan, ha ka jingdonlang ka Dr. H J Uriah, DNO, (Quality and Patient Safety) WJHs kum ka symbud kongsan.
Ka kong Blah haba ai jingkren kala ai khublei ïa ka jingtrei shitom jong ki nongtrei ka koit ka khiah haka ban kyntiew ïa ka rukom ai jingsumar Homeopathy sha ki paidbah nongshong shnong. Kala pynpaw ïa ka jingdonkam ban ai ka jingsumar ym tang ha kawei ka rukom hynrei dei ban kynthup kang ïa ki rukom sumar kiba bun naka bynta ka jingbha jingmiat jong koit ka khiah.
Kala ban jur ba kane ka prokram ka long kaba donkam na ka bynta ki samla pule, namar kaen kan ïarap ban pynsngewthuh shaphang ki rukom sumar bapher bapher kynthup ïa ka Homeopathy bad kiwei kiwei ki jait jingsumar jong ka AYUSH.
Shuh shuh ka kong Blah kala pynsngew hapoh ka AYUSH framework, ki kynthup ïa ka Ayurveda, ka Yoga, ka Unani, ka Siddha bad ïa ka Homeopathy la ithuh bad pyntreikam pura ha ri India na ka bynta ka lad jingsumar.
Ka Dr. H J Uriah, kala batai halor kala donkam ban ai ka jingsumar kaba bha tam bad ka jingshngaiñ jong kiba pang ba shitom, kala kyntu ïa ki nongsumar ban sam lem ïa ki jingtip ba bniah sha ki paidbah ha kaba ïadei bad ki jingdonkam ba man ka sngi, da kaba kyntu ban shim ruh ïa ki jinghikai jong u Dr. Samuel Hahnemann.
Kala pynsngew ki don haduh 34 ngut ki doktor AYUSH ha ka District kiba ai jingshakri mynta naduh ka Ayurveda, haka Yoga, Naturopathy bad Homeopathy. Ka la kdew ïa ka Unani bad Siddha kim pat don mynta ha ka District.
Kiwei de kiba ai jingkren ki kynthup ïa ka Dr. Bonnie T Hinge, DNO, AYUSH, u bah Bankiew B Kharsyntiew, State Program Manager, National AYUSH Mission, Meghalaya, Dr. Wallambha Suchen, AYUSH MO Shangpung PHC, Dr. Damika Rymbai, AYUSH MO, Nangbah PHC, Dr. Treyorika Passah Ayush MO, JCH Ialong bad Dr. Peterson L Lamare, AYUSH MO, Pdengshakap PHC.
La pynlong ruh ïa ka jingïakop thoh Essay kum shi bynta na kane ka prokram bad la sam ïa ki khusnam sha ki nongjop.
