Shillong, Ïaiong 16 : U Myntri Rangbah ka Jylla Conrad K Sangma u la ai ka jingïaroh ïa ka sorkar pdeng hapoh ka jingïalam jong u Myntri Rangbahduh ka Ri u Narenda Modi halor ka jingwanrah ïa ka Women’s Reservation Bill.
Da kaba ong ba katei ka dei ka jingdawa kaba la slem bha, u Myntri Rangbah u la ong ruh ba kane ka sienjam ba wanrah da ka sorkar pdeng kadei kaba ki pdiang sngewbha da baroh.
“Kane ka dei ka jingdawa kaba la slem bha bad kaba la dei ban leh naduh mynno. Hynrei ngi dei pat ban ai burom ïa u Myntri Rangbahduh ka ri halor kane ka rai kaba shlur kaba u shim,” ong u Conrad haba kren bad ki lad pathai khubor.
Shuh shuh u la ong ba watla kin don bun kiba pyrshah halor kane ka sienjam hynrei donkam pat ban peit jngai bad ki jingktah kiba kan wallam ïa ka imlang sahlang haba ïadei bad ka jingdon ki nongmihkhmat paidbah la ka long ha Meghalaya lane wat ha Parliament ruh ha kaba ka jingdon ki kynthei ba mihkhmat kam dei satia kaba haduh katta.
U Myntri Rangbah u ong ruh ba kane kan dei ka jingkylla kaba khraw ha ka synshar khadar ha kaba kan plie lad ïa ki kynthei ba kin donlang ha ki kyrdan kiba shajrong kaba kin lah ban shim rai.
“Kumta, kum ka party, ka National People’s Party ka ai ka jingkyrshan kaba pura halor kane ka rai,” u la ong da kaba kyntu ruh ïa baroh ki sengsain pyrthei, ki kynhun bapher bapher ba kin ai ka jingkyrshan lang na ka bynta ka jingmyntoi ka imlang sahlang jong ka jylla bad ka ri hi baroh kawei.
