Plie lad ka NCC-NER ïa ki cadet ka jylla, da ka Leadership & Adventure Camp ba 10 sngi ha WJH

Shillong, Ïaiong 16: Ka National Cadet Corps (NCC) jong ka North Eastern Region kan pynlong ïa ka Leadership cum Adventure Camp ba shi phew sngi ha West Jantia Hills District ka ban sdang mynta ka sngi. Ïa kane ka Camp yn pynlong ha Haven’s Cove, Jowai ha ka jingiatrei lang ryngkat bad ka Wailad’s Abode & Adventures.
Haba ïa kren bad u Major General u Anurag VIJ uba dei u Additional Director General NCC North Eastern Region u la ong, ha kane ka camp yn ia shim bynta tang ki cadet jong ka jylla Meghalaya bad kin don haduh shispah ngut ba kynthup 50 ïa ki kynthei bad 50 ïa ki shynrang.
U la ong, Ka jingthmu jong kane ka camp ka long ban ai ïa ki cadet ka jylla Meghalaya ïa ka lad ba kin leh ia ka trekking, scuba diving, off roading, caving bad kumjuh ruh bad kiwei kiwei. Shuh shuh u la ong, Kan don ruh ka jingleh team meeting bad ka jinghikai ban long ki nongialam bad ban ai lad ia kine ki khynnah ban wad bniah ha ka kam shang sawari namar ba ka jylla Meghalaya ka don ia shibun ki kam jngohkai pyrthei bad ruh ka kam shang sawari.
Na ka bynta kane ka camp yn jied tang ïa ki khynnah na ka jylla Meghalaya, ki subsequent camp kin dei ïa ki khynnah ka thain shatei lah mihngi bad kumjuh ruh ia ki khynnah jong ka ri India ba kin iohi ïa ka jylla Meghalaya.
Lyngba kane ka plie lad ïa ki cadet ba kin iohi ïa ka jylla Meghalaya bad ruh ban kyntiew ïa ka kam jngohkai pyrthei bad kan wanrah ruh ka jingiatylli hapoh ka ri. Kane kan dei ka sien ba nyngkong eh ba pynlong ïa kum kane ka camp bad ha ki por ban wan yn dang lah ban pynlong ia kum kine ki camp khnang ba ki paidbah nong shong sgnong kin ioh ka lad ban kamai kajih.
Shuh shuh u Major General u la ong ba kine ki khynnah ki ïa sah lang shi jaka bad kin ioh ka lad ban ïa phylliew jingmut ha ryngkat bad ka jingshah ai jinghikai bad kane ka iarap ïa kina ka bynta ban tei ha ka imlang ka shalang.