Thaw ka sorkar da ka Greater Shillong Waste Management Agency ban pynkhuid ïa ki jaboh jabaiñ ka nongbah

Shillong, Ïaiong 16 : Ka jingïalang jong ka Kynhun Myntri ha ka sngi Palei ka la mynjur ban don noh da ka Greater Shillong Waste Management Agency kaban treikam na ka bynta ban pynkhuid ïa ki jaboh jabain ha nongbah Shillong lada ki paidbah ki donkam ïa ka jingtreikam jong ki.
Haba kren bad ki lad pathai khubor hadien ka jingïalang jong ka Kynhun Myntri, u Myntri Rangbah u la ïathuh ba ïa kane ka rai ka sorkar ka la shim hadien ba ki dep ban ïa syllok bad kumba 100 tylli ki shnong kiba hap ha Greater Shillong.
Shuh shuh u la ong ba ha ka jingïakren ka paw ba ki paidbah ki kwah ban ïohi ba kan don noh da ka rukom lum jaboh kaba kham paka.
U Myntri Rangbah u la ong ba ka Shillong ka roi stet bha hynrei ka rukom lum ïa ki jaboh jabain pat kam long ha kata ka rukom. U la kdew ba don ki shnong kiba ïa ki jaboh jabain la lum da ki bor bapher bapher don kiba leh da ka Municipal Board, nangta ka Cantonment Board bad ruh da ka District Council.
Kumta, u la ong ba haduh mynta ka rukom lum ïa ki jaboh jabain kam dei satia kaba ihun bad dei na kane ka daw ka la poi ka rai ban don noh da ki kynja agency ban peit thik tang ïa kane ka kam.
“Dei na kane ka daw ba bun ki ai jingmut ba dei ban don noh da ki kynhun kynhun ne agency kiban peit thik tang ïa kane ka jinglum ïa ki jaboh jabaiñ. Lada phi peit ïa ka jingheh ka thain, ka la don bun bha ka jingïapher ha ka rukom lum bad kumta ka donkam na ka bynta ban pynbha shuh shuh ha ka jingtreikam.”
Katkum ka jingong jong u, ha ka jingïasyllok bad bun ki shnong ki la pynpaw ïa ka jingsngew ïahap. La ïathuh ba na ka liang ka sorkar ki la dep ruh ban ïa syllok lang wat bad ki district council kum ka KHADC nalor kiwei kiwei.
U Myntri Rangbah u la ïai ban biang ba kane kam dei satia kaba baroh ki hap ban leh beit hynrei ka shong beit ha ki shnong ki kwah neem bad lada ki don kiba kyrpad na ka liang ka Agency kan trei tang ha kito ki jaka kiba donkam ïa ka jingshakri jong ki.