La 11 bnai ba la treikam ka Beverage Pvt.Ltd ha Mendipathar, ïohkam palat spah ngut ki samla ka jylla
Shillong, Ïaïong 16: Ka jingleit jingjurip ki Co-Chairman bad ki Officer jong ka MIDC ha kane ka taïew ba la dep ïa Ka Varun Beverages Pvt Ltd kaba don ha Mendipathar, Resubelpara. Kane ka Plan ka dei kaba pynmih ïa ki soft drink kum Ka Pepsi, Slice, Sting, Marinda, Mountain Dew, Sprite., bad kiwei kiwei.
Ïa kane ka company la seng da ka jingïatreilang bad ka MIDC bad kaba la plie ïa ka ha ka 30 tarik u Naitung, 2025 da u Myntri Rangbah ka jylla u Conrad Sangma. Kane ka kompeni ka la long kaba la ai jingmyntoi shibun bha ïa ki samla Khasi Jaiñtia bad garo bad kumba long mynta ba dang shu sdang ruh ka la lah ban aikam ïa kumba palat 100 ngut tam ki Samla na ka jylla.
Ka Project Cost kaba la tei ka dei T. 340 klur bad ka dei ka plant kaba heh tam ha North East India bad kaba ar ha India baroh kawei ka ban pynmih ïa ki soft drink. Ka jaka kaba la tei ïa kane ka Pepsi plant kadei kaba la ai da ka MIDC bad ka jingheh ka long kumba 38 Acre.
Ka MIDC lyngba kane ka Plant ka ïoh ïa ka Land premium ha ka dor T. 300/- shi sq metre ha ka shi snem.
Kane ka jaka kadei kaba ka MIDC ka la don naduh mynshwa bad ka jingseng ïa kane ka Pepsi Plant ka la ai kam ai jam ïa kiba bun khamtam ki samla ha ka jylla.
Kiba trei hangne ha ka plant mynta khambun kidei Ki khynnah Garo bad Khasi-Jaiñtia
Kane ka Plant ka la ïaid shaid shaid ha ka jingpynmih ïa kine ki soft drink. Kane ka company ka la ïaid la 11 bnai bad ka lah ban pynmih 1200 tylli ki bitor Umsoh ha ka shi sngi.
Kiba khmih ïa kane ka company kidei u Mishra u Manager uba khmih ruh ïa ka Human Resource (HR) ban ai jinghikai ïa ki samla hadien ba ki pyndep graduate bad u Manish uba dei u General Manager ka Company.
Ïa kine ki Umsoh yn pynïaid ïew ha Meghalaya, Assam bad ka north east bad ha ka ri India baroh kawei.
La ong ba kane kan dei ka jingkiew ka ïoh ka kot ka jylla ka ban sa kynjoh sha ka thong bad ym don ruh kiba lah ban mutdur ba kane ka karkhana pynmih Umsoh kaba heh tam ha ka pyrthei kan wan poi sha Meghalaya, ha Mendipathar.
La ong ba ka sorkar jylla ka la ïateh bad kane ka karkhana lyngba ka PPP model bad ban pynlong ruh ïa ka sawdong sawkun kaba bha ha ka jylla da kaba pdiang ïa kiba wan ban pynlut ha kum kine ki jaitkam.