Plie u Dr DD Lapang ïa u mot sah kynmaw ban ai burom ïa ka ïing u (L) Friday Lyngdoh ha Nongjri Pres SS
Nongpoh, Nailar 20: Kum ka jingsngewnguh bad ka jingburom ïaka jingkylluid mynsiem ka iing ka sem jong u (L) Welingroy Jyrwa bad (L) Tbn. Dr. Friday Lyngdoh u ba la long teng ruh kum u Myntri Sorkar barim ka sorkar jylla, kiba la ai sngewbha ïaka jaka ban tei ïaka Nongjri Presbyterian Secondary School, ki bor pynïaid katei ka skul mynta ka sngi kila plie paidbah ïa u mot sah jingkynmaw naka bynta kitei ki 2 ngut ki riew rangbah bad kumjuh ruh ka jingpynkup burom ïaki bahaiing hasem jong kitei ki rangbah bala bam kwai ha dwar u Blei.
Ïa utei u mot sah kynmaw la wan ban plie paidbah da u Dr. D. D. Lapang nongaibuit ba rangbah ka sorkar jylla kum u kongsan haka jingdon lang u bah Charles Marngar MLA bad MDC ka Mawhati bad uba dei ruh u President ka Managing Committee jong katei ka skul, u bah James Born Jana Chairman Nongjri Pyllun, Tbn. W B Malieh, B Kyrsian Secretary SMC, ki bahaïing ha sem jong i (L) Welingroy Jyrwa bad Late Tbn. Dr. Friday Lyngdoh, ki nonghikai, ki khynnah skul lem bad kiwei kiwei.
Kum ka skul ka pynpaw ba lymda kitei ki rangbah kim don ka mynsiem ba kylluid ban ai ïa katei ka jaka katei ka skul kan nym ieng kumba ka long mynta ban long ka shlem hikai ban dang kyntiew ïaka jingnang jingstad ha katei ka thaiñ.
Ha kane ka sngi la ai jingkren naduh u Dr. D.D Lapang bad ruh u Bah Charles Marngar, ha kaba ki la ai ka jingkhublei kaba kyrpang ïa ka ing ka sem jong u (L) Welingroy Jyrwa bad (L) Tbn. Dr. Friday Lyngdoh, namar dei lyngba ka jingkylluid mynsiem jongki, kane ka skul jong ka Nongjri Presbyterian Secondary School ka la ieng skhem mynta ban ai jingnang jingstad ïa ki khynnah bad ki samla katei ka thaiñ Nongjri bad kiwei kiwei ki shnong ba marjan.
Na ka liang u Dr. D.D Lapang bad u Bah Charles Marngar, ki la pynpaw ruh ba kane ka jingïaid shaphrang kane ka skul ka dei na ka jingai sngewbha katei ka longing sha ka Balang Presbyterian, ba ka Balang ka la lah ban seng ïa kane ka skul, wat hapdeng shibun ki jingeh bad ki jingtynjuh bad u Blei um shym la iehnoh ban kyntiew ïa katei ka skul katba dangmih ki sngi ryngkat ka jingtrei shitom bad len lade naduh ki nonghikai bad ki bor pyniaid skul.
Ki bor pyniaid katei ka skul mynta ki don ruh ka jingangnud ban kyntiew kyrdan noh sha ka Higher Secondary School bad ruh ka English Section ban nang pyniar ïaka shlem hikai bad halor katei naka liang ka Balang, ki bor pyniaid skul bad kumjuh ruh ka shnong kin sa shong pyrkhat ban pynurlong ïa katei ka jingthmu.