Nga kwah ba u mot jong u Sngap Sing Syiem un long noh shi rynïeng: Sanbor Shullai

Mawkyrwat, ‘Nailar 20: Kum ka dak jong ka jingpynsah nam ïa u ‘riew khraw jong ka Hima Maharam, u ‘Sngap Sing Syiem’ uba dei ruh u ‘riew ïaleh pyrshah ïa ki shipai phareng ha ki snem kiba la leit noh, u bah Sanbor Shullai, MLA ka South Shillong Constituency u don ka jingthrang ba ka dur mot jong u Sngap Sing Syiem un long noh baroh shi rynïeng ym shuh tang shiteng.
Haba kren ha ki lad pathai khubor ula ong ba kum ka Hima Maharam ka la pynmih ïa ki nongïaleh laitluid bad ki Syiem ba khraw kum u Sngap Sing Syiem, u bah Sanbor Shullai ha ka jingwan ïuhkjat jong u ha South West Khasi Hills District ha ka sngi rakhe ïa ka Sngi Laitluid jong ka Ri India kaba 78th, u la don ka jingthrang ha ka mynsiem jong uba u dei ban leh ei ei halor kane ka bynta khnang ba kan long ka jingsah jingkynmaw ïa ka pateng ban wan da kaba kin ïohi ïa ka dur mot ba shi rynïeng jong u Sngap Sing Syiem.
Ym tang kata, ha ka jingkren jong u u kwah ruh ba ïa ka ‘Circuit House’ ha Laitlawsang kaba don ïa ka kyrteng mynta yn pynsah nam noh da kaba kyrteng noh “Sngap Sing Syiem Circuit House”. “Nga pynsngew ïa kane ha ki paidbah ryngkat ka jingthmu ba ma un hi da lade un sa rah bad pynsngew ruh sha ka sorkar halor kitei ki ar tylli ki mat ba kongsan khnang ba kan long ka jingsah nam sah burom hapoh ka South West Khasi Hills District”, ong u bah Sanbor.