Dawa ban pynkylla kyrteng noh ïa ka Circuit House sha ka Sngap Sing Syiem House

Mawkyrwat, ‘Nailar, 20: Ka Hynñiewtrep Youth’s Council (HYC) jong ka South West Khasi Hills District mynta ka sngi ka 20 tarik u ‘Nailar, 2024 ka la leit ban ïa kynduh ïa u Deputy Commissioner ka South West Khasi Hills District halor ka mat ban pynkynmaw ban pynkylla kyrteng noh ïa ka ‘Circuit House’ sha ka ‘Sngap Sing Syiem House’, kaba don ka Laitlawsang, South West Khasi Hills District.
Ha ka shithi ba ka HYC, South West Khasi Hills District sha Deputy Commissioner ka South West Khasi Hills District lyngba u bah Arbok Kharjahrin, President bad u bah Pynskhem. Kharjahrin, Secretary ki la pynpaw ba kane ka dei ka jingpynkynmaw ban pynkylla kyrteng noh ia ka Circuit House sha ka Sngap Sing Syiem House namar kam pat don kyrteng ei ei haduh mynta bad da ka jingpynkylla kan long ka jingpynsah nam pynsah burom ïa une u Syiem bakhraw ka Hima Maharam uba lah ban don bynta ruh ban ïakhun shitrhem ïa ki shipai phareng ha ki por ba mynshwa ryngkat u Syiem Bakhraw ka Hima Nongkhlaw u Tirot Sing Syiem.
Shuh shuh kumba ki ju pynkynmaw bad ju dawa ruh man ka por na ki bor Sorkar, kumta mynta ruh sa shisien kum ka seng ka wan ban buh biang ïa kane ka jingkyrpad ba ka sorkar kan sngewbha ban buh noh da ka kyrteng u ‘Sngap Sing Syiem’ khnang ba ka nam bad ka burom jong u Syiem ka Hima Maharam bad jong ka Jaidbynriew Hynñiewtrep baroh kawei kan ïai neh junom la junom.