Shabar ka Jylla hap leit thoh eksam ki samla ba thep kam ha NEIGRIHMS

leit kynduh Director ka KSU

By Mawphor News Desk On Dec 7, 2023

Shillong, Nohprah 06 : Ka Khasi Students Union (KSU) ha ka janmiet sngi Balang kala leit ban kynduh ïa u Director ka NEIGHRIMS u Dr. Nalin Mehta ban pynsngew ïa ka jingeh jong ki samla ki ban hap leit thoh eksamin sha bar ka Jylla na ka bynta ki kam ba lait ha kane ka Hospital.
Haba kren sha ki lad pathai khubor u General Secretary ka KSU u samla Donald V Thabah ula ïathuh ba ki kam kiba lait ha kane ka Hospital ki dei ha ka kyrdan Grade B, C bad ka buh jingeh ïa ki samla namar ki hap ban mih lypa da ki sngi tang ban leit thoh ïa ka eksamin namar ki jaka thoh eksamin ki la long lypa kiba jngai.
“Ka seng ka la ïoh jingujor na ki samla kiba thep kam ha kane ka Hospital ba ki hap ban leit thoh ïa ki eksamin kum sha Jorhat, Guwahati bad New Delhi bad ki kam kiba lait kidei ha ka kyrdan Grade B bad C,” u la ong.
U la ïathuh ruh ba ha ka jingïakynduh bad u Director, ka seng ma la ïoh jingtip ba ka Hospital ka la dep ban aiwai sha ka HLL Company ban pynlong ïa ki eksamin thungkam namar ka Meghalaya kam biang ki jaka pynlong eksamin bad ki kor Computer.
U la ïathuh ba watla ka Jylla ka don ki jaka thoh eksamin da ki Computer hynrei namar ka dang dei ka por thoh eksamin, kumta ka NEIGHRIMS ruh ka hap ban aiwai noh sha ka HLL Company ban pynlong ïa ki eksamin thep kam ha kane ka Hospital.
Khnang ba ki samla thep kam jong ka Jylla khamtam kiba duna ka ïoh ka kot kin ym ïakynduh jingeh shuh nangne shakhmat ha kaba ïadei bad ka jingthoh eksam, na ka liang ka seng ka la kyntu ïa u Director ka NEIGRIHMS ban pynlong noh hapoh la ka jong ka Jylla.
“Ngi la kyntu ïa u Director ka NEIGHRIMS ba nangne shakhmat kadei ban pynlong da ka survey ïa ki jaka ban pynlong eksamin hapoh Meghalaya ban long ka jingmyntoi ïa ki samla ka Jylla. Bad kumjuh ngi la kren shai sha u Director ba ka NEIGHRIMS kadei ban ailad shwa ïa ki samla trai Jylla ha ki kam kiba lait ha kane ka Hospital, bad u Director ruh u la kren shai ba ka Hospital kan bhah kam kaba 44% ïa ki samla trai Jylla,” la ong u samla Donald V Thabah.