Jah klep ki nongujor ha Iewduh, khynra Laisen tang dep ki EM bym tip ïa ki jaka leh Benami

Shillong, Nohprah, 06: Ka Khasi Hills Autonomous District Council (KHADC) ha ka sngi Balang ka la pynlong ïa ka jingkhynra Trading License ha Iewduh hadien ka jingïoh ujor na kawei ka kynhun kaba la tip kyrteng kum ka Khun Kynthei Hynñiewtrep Association (KKHA) ba ki don ki nongdie dukan ha Iewduh kiba bym don ïa ka Trading License bad ki don ruh kiba shu leh Benami.
Ïa ka jingujor ka KKHA ka la aiti ha u Chief Executive Member (CEM) jong ka Khasi Hills Autonomous District Council (KHADC) u Bah Pynïaid Sing Syiem dang shen bad ha kane ka jingkhynra mynta ka sngi, ki nongïalam jong kane ka kynhun kim shym la wan mih satia ban ïalam lynti bad ban kdew ïa ki dukan jong ki bar jylla ki bym license.
Ha kane ka jingkhynra ba la lamkhmat da u Executive Member i/c Trade la synrang lang da ki MDC ba kynthup ïa u Bah Fantin Lakadong bad u Bah Gabriel Wahlang, u Syiem jong ka Hima Mylliem u Pa’iem Ainam Manik Syiem, ki Myntri ka Hima Mylliem, ki Ophisar jong ka KHADC, ki Pulit ka tnat Enforcemnt bad ki Pulit Syiem.
Namar ka jingbym tip shai katkum ka jingujor jong ka KKHA halor ka jingkynnoh ba ka don ka jingleh Benami ki kynthei Khasi kiba shong die jingdie ha Iewduh, na ka liang jong ka KHADC bad ka Ophis u Syiem Mylliem ka la pynlong tang ïa ka jingkhynra ha Basa dei Kot bad la shu phah noh ïa ki Enforcement ban khynra pyndep hapoh Iewduh bad ha kane ka jingkhynra ka KHADC ka la khang tala saw tylli ki dukan kiba khlem pynthymmai shuh ïa ki laisen ki jong ki.