Khot hajir ka ïing bishar High Court ïa u SP East Jaintia ba dang bteng ka jingtih dewiong beaiñ

Shillong, Nohprah 6 : Ka ïing Bishar High Court jongka jylla ka khot hajir ïa u Superintendent of Police (SP) East Jaintia Hills ha ka 11 tarik Nohprah 2023 ha kaba ïadei bad ka jingbteng ka jingtih dewiong beaiñ ha katei ka district.
Ha ka hukum jong ka Division Bench ba kynthup ïa u Acting Chief Justice H.S Thangkhiew bad u Justice W Diengdoh, halor ka kaiphod ba la ai da ka Single Member Committee ba dei u (Retd) Justice B.P Katakey la bthah ïa u SP jongka East Jaintia Hills ba un wan hajir da lade hakhmat ka ïing bishar ha ka 11 tarik Nohprah 2023 ha ka por 10.30 mynstep ban pynshai halor kane ka kaiphod.
Ka kaiphod ka pynpaw “Ka jingshisha ka long ba ïa u dewiong ba dang thymmai la lum thup harud surok bah ha lyndet jongka Don Bosco College, Byndihati ka pynpaw shai kdar ïa ka rukom treikam ki bor synshar district khamtam eh u khlieh jongka tnad pulit jongka district uba dei u SP bad na kata ka daw ruh la bthah ba un wan pynshai halor kane”.
Na ka liang ka sorkar ka la ai ia ka kaiphod ha kaba la pynpaw ïa ki lad ba la shim kat kum ka jingai jingmut jongka Committee ba la khlieh da u Justice Katakey.
Ka Committee ka la pan ruh ïa ka kaiphod na u Deputy Commissioner bad u hap ban ai ïa ka kaiphod hapoh shitaiew bad ban pynshai kumno ka jingtih dewiong beaiñ ka dang ïai bteng beit hapoh ka district.
Na ka liang ka sorkar ka la pyntip ruh ha ka kaiphod ba la dep ujor FIR ha Khliehriat Police Station bad na ka liang ki briew ka Directorate of Mineral Resources ruh ki la dep lum jingkheiñ ïa ka jingdon u dewiong ba 4900.20 matric tonne.