Nongstoiñ, Nohprah 6: Uwei na u rangbah ba la tip kyrteng u Bah Saiñding Marngar, u khun khatduh jong u (L) Bah Lorshon Marbañiang, na ka shnong Mawkhiat kaba don ha thaiñ Rambrai West Khasi Hills District, u la jah rngai mynta la palat 18 snem bad ym shym la lap dien shuh satia.
U bah Kaspar Marngar u ba dei u hynmen trai jong u Bah Saiñding Marngar haba ïakren bad u nongthoh khubor mynta ka sngi, u la ong ba utei u para khatduh u la jah naduh u snem 2008 hynrei ki kur bad kiba ha ïing hasem. kim shym la leit ban pyntip sha ki pulit namar ki dang ïaleh ban wad jingtip shaei u don.
U la ong ruh ba hadien katto katne snem ba u la jah, ki don ki para shnong kiba ïathuh ba ki ïohi ïa u ha Shella bad ki la pyrshang ban leit sha Shella ban wad jingtip na ki shnong bapher bapher ha katei ka thaiñ hynrei im lap satia.
U la ong ruh ba wat la kim lap ruh haduh mynta ki dang ap khmih lynti ïa u ba lano un wan phai biang sha la ki kur ki jait bad kiba ha ïing ha sem, namar ba dang ha kine ki snem ba la dep ki dang telephone ïa u bad ki dang ïoh ban ïakren, hynrei mynta la kumba ar ne lai snem ei ei lada ki telephone ruh kim ïoh shuh.
Ha kajuh ka por utei u hynmen u la ong ba ha kine ki sngi kin sa leit ban buh noh da ka ejahar sha ki pulit ba kin ïarap lem ban wad jingtip la u dang im ne em. Utei u rangbah u la ong ruh ba lada don kino kino kiba haei u don ne kiba ïohi ïa u kin sngewbha ban pyntip da kaba telephone sha une u number 9366160956.
