Sha Sohra leit jngoh ka kynhun World Bank ïa ki bynta ba kongsan jong ka koit ka khiah

Shillong, Jymmang 16: Ka kynhun jong ka World Bank kala leit jngoh ïa ka Sohra kaba don ha East Khasi Hills district ban khmih bniah ïa ki bynta kiba kongsan jong ka koit ka khiah bad ka bha ka miat jong ki samla, kaba la pyntreikam hapoh jong ka Meghalaya Health Project bad ka MPOWER programme.
Kane ka kynhun kala leit jngoh ïa ka Sohra Community Health Centre (CHC), ïa kaba la kyntiew kyrdan sha ka First Referral Unit (FRU) hapoh jongka State Service Delivery Redesign ka sienjam kaba la kyrshan da ka Meghalaya Health Project.
Ki ophisar kila ong, ba ka CHC kala treikam na ka bynta ka IPA/OBB lyngba ka jingkyrshan ka Outcome Based Budgeting, da ka jingthmu ban pynkhlain ïa ka jingai jingshakri ha ka koit ka khiah bad ban kyntiew ïa ka jingai jingsumar ha ki shnong ki thaw.
Ha katei ka jingjngoh, katei ka kynhun kala khmih bniah ïa ka rukom treikam jong ki jaka ai jingsumar bad ban ialeh ban pynjanai shuh shuh. Ka kynhun jongka World Bank kala leit jngoh ruh ïa ka Pomlum Primary Health Centre (PHC) ban khmih bniah ïa ka jingpyntreikam ïa ka Health and Wellness Programme ha ki shnong ki thaw.
Kum shi bynta jong kane ka jingleit jurip, kane ka kynhun kala leit ruh sha Cherra Presbyterian School ban khmih bniah ïa ki kam ki jam kiba la leh lyngba Meghalaya Multisectoral Project for Adolescent Wellbeing, Empowerment and Resilience (MPOWER).
Kane ka kynhun kala peit ruh ïa ki jingai jingbatai ha kaba iadei bad ka bit ka biang ki samla kaba la pynleit jingmjut ha ki jingai jingpynsngewthuh, ban long kiba skhem jingmut bad ka jingroi kaba salonsar na ka bynta ki samla.
Kala leit ruh ban jngoh ïa ka CMYC Centre ha Madanlyngki, kaba la kyrshan hapoh jongka MPOWER ban khmih ia ka rukom treikam na ka bynta ban pyndonbynta bad ban pynkupbor ia ki samla.
Hadien kane, katei ka kynhun kala leit ruh ban jurip ïa ka Sub-Centre ha Mawkdok, kaba la tei lyngba ka Meghalaya Health Project, ha kaba ki ophisar kila pyni ia ka jingpynbha ia ki jingtei, ka rukom pynwandur ia ka koit ka khiah bad ban pynkhlain ia ka jingshakri ha ka koit ka khiah ha ki thain nongkyndong.
Ki ophisar kila ong, ba katei ka jingleit jurip kadei da ka jingthmu ban khmih bniah ia ki projek kiba dang iaid shakhmat bad ka jingiatreilang ban pynkhlain ia ka koit ka khiah bad ia ki sienjam ban kyntiew ia ka imlang sahlang hapoh Meghalaya.