Namar ka jingtlor bad sniew ka jingkieng Betasing, mana ki bor pynïaid Distrik ban ïaid ki kali heh

Shillong, Jymmang 16: Ka District Administration jong ka South West Garo Hills ka la maham ban shah ïaid ïa ki kali heh na ka jingkieng No. 15/3 ha Betasing na ka surok Garobadha-Dalu kaba bud da ki kaiphod jong ka jing julor katei ka jingkieng.
Ïa kane ka hukum, la pynmih da u District Magistrate, u Anendya Raajsshre, IAS, hapoh ka kyndon kane Section 163 jong ka Bharatiya Nagarik Suraksha Sanhita (BNSS), 2023, ha ka jingkhmih na ka bynta ka jingshngaiñ jong ki paidbah.
Katkum ka jingïathuh jong ki heh sorkar, u Executive Engineer, PWD (Roads), Ampati Division, u la pyntip ba katei ka jingkieng ka la sdang julor ha ka 14 tarik Jymmang, kaba pynlong ïa ka jingma ban ïaid ki kali bad briew.
Ki heh ba dei peit ki sheptieng ba lada bteng kane ka jingïaid ki kali heh ka lah ban ïalam sha ka jingtlor jong ka surok bad jingtwa.
Kumta, baroh ki kali kit khia, kynthup ïa ki trok kit mar khia, ki bos, tanker, ki kali kit maw bad kiwei kiwei ki kali ba kit khia palat pud, la mana ban ïaid lyngba katei ka jingkieng tad haduh ban da pyndep ban shna bad maramot.
Ka tnad ba dei peit ka la pyntip ba la don ka surok na ka bynta ban ïaid kine ki kali. Katba ïa ki kali heh, la hukum ban ïaid beit beit na Betasing sha Ishaguri lyngba ka surok PMGSY, bad ïaid beit beit sha Mirjumla lyngba ka surok Garobadha-Mankachar bad hadien katei, kin bteng ban ïaid sha Ampati lyngba ka surok Ampati-Mankachar.
U Superintendent of Police, District Transport Officer, and Executive Engineer, PWD (Roads), u la shah bthah ban bud ïa katei ka jinghukum bad phah buh da ki kynroh-set lynti bad ki dak jingthoh ha ki junction kiba kongsan.
Ki heh sorkar ki la ong ba ka jingpynkheiñ ïa kane ka jinghukum, kan sa shim khia hapoh ka jingpeit jong ka aiñ. Katei ka jinghukum ka la wan mar mar bad la dep ban pyntip ha kylleng kane ka distrik.