Dap tang da ka ktieh ki surok ha SGH, naba leh bym suitñiew ki kompeni ban maramot: Greneth Sangma

Shillong, Jymmang 16: Ka la don ka jingleit buh jingujor bad ka tnat PWD (Roads) ha South Garo Hills pyrshah ïa kawei ka agency kaba la pulom ban sumar ban maramot ïa ki surok kiba la pyntrei hapoh ka PMGSY kaba don ha kane ka district.
U nongtrei mon sngewbha (Social activist) u Greneth M. Sangma ha ka jingujor u la pynpaw ïa ka jingleh bym suitñiew jong kawei ka kompeni kaba khmih bad sumar ïa kitei ki surok kaba la tip da ka M.P. Agarwala Pvt. Ltd. bad ka J.C./M/S M.P. Khaitan.
U Greneth ula pynpaw ka jingsngewkhia ïa ki katto katne ki jingtrei jong ki surok kiba kham pawkhmat kum ka Karukol-Nengkong-Emangre-Tolegre Road, Nengkong Songmong sha Upper Dosogre, Mindikgre sha Gara Songgital bad ka surok Emangre sha Nokatgre.
U la ong ba kine ki surok, kiba jngai da kiba bun kilometer la mang da ka jingbei pisa katto katne da ka sorkar hynrei la iohi ba ki la mad ki jingsniew jong ki na ka daw ka jingbym biang ki rukom sumar bad jingmaramot.
U la ong ba ka Karukol-Nengkong-Emangre-Tolegre project ka kynthup 16 km bad la ïohi ïa ka jingmang pisa kaba long T. 1722.65 lak, hynrei haduh 970 meter jong ka surok khlem pat pyndep ïa ka jingsiang rong. Ka surok kaba jrong kumba 9.27 km ka Nengkong Songmong sha Upper Dosogre, ka jingïar kaba la mang T. 1628.70 lak la ïohi ba ka la dap da ka ktieh bad ka jingbtuid bad dei na kane ka daw ruh ba ka la pynpra bad pyntwa lut ïa ka rong bad ka jingdap jong ka ktieh ka la pynthut ïa ka jingïaid lynti jong ka wah duid.
Shuh shuh u la ong ba ka projek Mindikgre sha Gara Songgital kaba la dep mang T. 650.66 lak la ïohi ba ka la don ka jingtwa jong ka slab kaba hajan bakut ka surok, kaba la buh ka jingma ïa ki lad jingpynïasoh bad ka jingshngaiñ jong kumba 642 tylli ki longïing jong ki shnong Mindikgre bad Gara Songgital.
Ka surok Emangre sha Nokatgre kaba la mang T. 170.81 lak kaba la pyndep 100 per cent ha u bnai Jymmang snem 2021 kam shym la don ne ïoh ka jingdonkam ban pynbha kaba dei san snem kaba hab bad donkam hapoh ka Meghalaya Road Maintenance Policy, ula bynrap.
U Greneth u la ong ba ki jingmih na kine ki jingpulom ban maramot bad sumar ïa kine ki surok ka long ka jingeh ba hap ban mad da ki nongshong shnong, kynthup ki khynnah skul, kiba ïakhuh ban ïaid na kine ki surok ba sniew bad kaba la wanrah ka jingdkoh bad wanrah jingma ïa ka jingshong shngaiñ bad kumjuh ruh ka jingdonkam ban leit sha ki jaka pule.
U la ïathuh ruh da kaba pyni nuksa ba wat ka kali jong u, marsien poi ha kine ki surok kam long shuh ban ïaid bad ka la sahkut na ka daw kane ka jingbym suitñiew, ha kaba kane ka donkam ka jingshimkam kaba kyrkieh. Kumta u la dawa ka jingpynleit jingmut kaba mardor ban wanrah biang ïa ka jinglong ba bha jong kine ki jingtei bad ban pynneh ban bat ruh ïa ki kyndon kumba la ïateh ha shwa ban shna ïa kine ki surok.
Shuh shuh u la kyntu ïa ka tnat ban shimkhia pyrshah ïa ki agency bad ban pynlong ka jingjurip kaba kyndit khnang ban lah ban maramot ïa kine ki surok kiba la julor.