Sha ophis u DC Ri Bhoi lum ki Longkmie ban dawa ïa ka hok ban ioh khaw rashon

0

Nongpoh, K’lyngkot 13: Ka kynhun ki Longkmie na ka thain Tyrso ba hap ha Ri Bhoi District mynta ka sngi ki la leit ban lum syndon ha ka ophis u Deputy Commissioner ka Ri Bhoi, kaba ki la pynpaw ba ki kwah ban ioh jingshai halor kano ka nongrim ba da ki spah ngut ki longing baduk ha katei ka thaiñ kim shym la ioh ïa ka ration card ba la mang da ka sorkar kmie.
Haba leit ban sha ka ophis u Deputy Commissioner la ïalam da ka Kong Iohilut Lyngdoh lem bad kiwei ki longkmie ba la kot da ki spah ngut bad ka jingthmu jongki, ka long ba ki sah ha ka umdum ba naduh ka Census 2011 haduh mynta kiba bun ki longïing baduk kim pat ioh rung ha kata ka thup ban ioh ïa ka ration card ba la mang kyrpang da ka sorkar kmie ïa ki longïing baduk ha ka ri.
Haba kren sha ki lad pathai khubor, ka Kong Iohilut Lyngdoh lem bad kiwei ki Longkmie, ki la ong ba ki ka jingthmu ba ki wan ïa kynduh sha u Deputy Commissioner ka Ri Bhoi, ka long ban wan jingtip halor kano ka nongrim ba kiba bun ki longing baduk kiba dei hok ban ioh ïa u khaw ration kim ioh rung ha ka thup kyrteng ban ioh ration card bad dei namar kane ka daw ki wan ban ïa kynduh ïa u deputy Commissioiner ban ioh ïa ka jingpynshai kaba bniah.
Ki la ong ruh kaei kaba ki kham sngewkhia khia, ka dei ba bun ki longïing baduk kiba dei hok ba ioh ïa ka khaw ration kim pat ioh satia bad kane ka la buh jingeh ïa ki, ha kaba kiwei ki longing kiba kham bit kham biang ki ioh ïa ka ration card katba kiba duk pat kim pat ioh satia haduh kine ki sngi.
Haba pynshai ruh halor kane ka jingwan ki Longkmie sha ki lad pathai khubor, u Deputy Commissioner ka Ri Bhoi, u Abhilash Baranwal, u la ong ba ki don shisha ki Longkmie kiba la wan kynduh ïa u ban ïa kren halor ka ration card, kaba kim pat ioh satia wat lada ki la dep ban pynrung kyrteng, hynrei u la pynshai ïa ki, ba ka ophis jongu, kam lah ban lei ei lada ym don kata ka jingmang thymmai da ka sorkar kmie .
Shuh shuh, u la ïathuh ruh wat la katta ruh un sa shim khia ïa kane ka mat ba la wan rah da kine ki Longkmie sha ki bor ba dei peit bad kum ki Longkmie ki hap pat ban sngewthuh ba lada ym don hi kata ka jingmang na ka sorkar kmie ka ophis jong u kan nym lah ban lei ei namar ïa kane ka jingmang ïa ki ration card la leh da ka sorkar kmie, u la bynrap.

Leave A Reply

Your email address will not be published.