Yn ym leh shilliang ka tnat pulit pynïaid kali ïa ki kali kiba tah ïit ïong

Shillong, K’ Lyngkot 13: Ka Shillong Traffic Police (STP) mynta kan ym shah shilliang la ki dei ki kali sorkar ne kino kino ki kali lada ki pynkheiñ ïa ki kyndon haba ïadei bad ka jingpyndonkam ïa ki ïit ïong ne kiwei pat ki kam.
Haba pynpaw hapoh ka social media post, na ka liang ka STP ka la ong ba ka tnat ka la ïohi ïa ki jingai jingmut bad ki jingsngewkhia ba la pynpaw da ki paidbah ha kaba ïadei bad ki jingsawa palat na ki tyndong pynsawa ba la pynkylla thymmai ne ki exhaust pipe, kiba la sawa jam palat bad ka jingai honk kaba ym da donkam satia bad ka jingpyndonkam bakla ïa ka bor jingpynthaba ki light kali ne high beam headlight.
Ka STP ka la ong ba ka long kaba kloi ban khmih ïa kine ki jingeh ba la pynpaw da ki paidbah bad kan pynthikna ba kan don ka lad jingïada bad ka sawdong sawkun kaba suk ba saiñ na ka bynta jong baroh.
Halor ki jingmlien kiba ktah na ka jingpyndonkam ïa ki exhaust pipe ba la pynkylla thymmai, ka tnat ki kam pynïaid kali ne traffic police ka la ong ba kan ïaibteng ban pynlong ïa ka jingtalasi kaba manla ka por ha kylleng jong ka nongbah Shillong khnang ban lap ïa kiba pyndonkam bakla bad kumjuh ruh ban pynshitom ïa kiba pynkheiñ ïa ki aiñ da kaba pyndonkam ïa ki ïit ïong ne ki exhaust pipe kiba sawa jam.
Ka tnat pulit ka la ïathuh ruh ba ka la sdang ïa ka jingïalap ban pynsngewthuh paidbah bad ban hikai ban pyntip ïa ki trai kali halor ki kam jong ka aiñ bad kumjuh ruh halor ka jingshah ktah haba ïadei bad ka sawdong sawkun kaba ktah ruh ïa ka jingsawa kaba ktah ïa ki paidbah.
Ka tnat ki pulit Traffic ki la peit ruh ïa ki jaka ki bym shah satia ban pynsawa da ki honk khamtam ki jaka hajan ki skul, hospital bad ki jaka sah paidbah bad kan don ruh ka jingshaiñ kuna ïa kito kiba pynkheiñ ïa ki kyndon jong ka aiñ.
Ka la don ruh ka jingpynlong ïa ka jingïaid pahara ban talasi halor ka jingpyndonkam bakla ïa ki light kiba thaba palat ne ki high beam headlights ha ki surok ha sor bad ban hikai ruh ïa ki nongniah halor ki jingïada ban kiar na ki jingpynmatlah ïa kiwei pat kiba pyndonkam lang ïa ka surok.
Na ka liang ka tnat ki pulit pynïaid kali ka la ïathuh ruh ba baroh ka pisa kaba la ïoh na ka jingshaiñ kuna ïa kiba pyndonkam bakla ne kiba pynkheiñ ïa ki aiñ, ka leit sha ka pla tyngka jong ka sorkar jylla bad ka tnat STP kam buh satia ïa kane ka pisa shaiñ kuna.
Ka tnat traffic ka la ïathuh ruh ba kan ym mab satia wat ïa ki kali sorkar kiba pynkheiñ ïa ki kyndon haba ïadei bad ka jingtah ïa ki ïit ïong. Ïa kiba pyndonkam ne tah ïa ki ïit ïong la weng lut baroh bad ka shaiñ kuna ruh ïa ki kali bad na ka liang ka STP ka angnud ban pyntreikam beit ïa ka hukum jong ka Supreme Court halor kane ka kam khlem da leh shilliang ne kheiñ beiñ ïano ïano ruh.