Sha New Shillong pynkynriah ka sorkar ban pynlong ïa ka Cherry Blossom ha u Naiwieng

Shillong, Nailar 31 : Ka Shillong Cherry Blossom Festival-2026 kan long ha ka 20-21 tarik Naiwieng ha ka jaka ba thymmai ka ban pynlong noh shirta ka New Shillong Highland Ground- ha kaba ki kynhun tem bapher bapher kin pynshongshit ïa ka tamasa kynthup ïa ki khlur rwai ka ri America u Khalid, Swae Lee bad Boys Like Girls kum ki kynhun bar ri bala pynbna nyngkong.
Ki nongpynïaid ki pyntip ba kin sa pynbna biang shen sa ïa arngut/artylli ki kynhun nabar ri ki ban wan tem ha kane ka tamasa.
Kane ka tamasa kala leit sha New Shillong hadien ka jingjop ka tamasa 2025 kaba wan pynshongshit u Jasan Derulo, The Script, Tyga, Diplo, Nora Fatehi bad Aqua.
Ka Sorkar Jylla kala ai ia ka New Shillong Highland Ground kum ka jaka ba shirta ban pynlong ïa ki tamasa kiba heh bad ki concert.
Ki nongpyniaid ki ong ba kane ka jaka, kaba jngai 30 minit na sor Shillong, kan pynsuk bha ïa ka leit ka wan jong ki nongwan tamasa na Jowai, Assam bad ki Jylla ba marjan.
Ka jingpynkynriah sha kane ka jaka thymmai ka la pynslem ïa ka jingpynbna ïa ka thup ki nongtem bad nongrwai jong une u snem namar ka jingdonkam ban pynbit pynbiang ïa ki jingdonkam baroh na ka bynta kine ki nongrwai nabar ri. Da ka jingpynthikna mynta ïa ka jaka, ka jingïalap kan ïaid shaid shaid noh shakhmat, ong ki nongpynïaid.
ïa ki ticket yn die live ha ka 4 tarik Nailur ha ka por 6 baje janmiet tang na ka RockskiTickets.com, bad ka pass ba treikam shisngi ka shongdor 2500 tyngka kynthup ki khajna.