Shillong, Naitung 02: Ka United Democratic Party (UDP) ka la rai ban phah jingthoh sha ka Law Commission of India ïa ka jingsngew ka party ha kaba ïadei bad ka jingthmu ka sorkar pdeng ban pyntreikam ïa ka Uniform Civil Code (UCC) ha ka ri.
“Ngi sa phah ïa ka jingsngew ka party ha kaba ïadei bad kane ka mat bad ngin sa ïathuh ïa phi ïa kaei ka nongrim kaba ngi ieng ha kaba ïadei mad ka UCC,” ong u General Secretary ka UDP u Dr Jemino Mawthoh ha ka jingïakren bad ki lad pathai khubor,
U la ong ba ka UCC ka dei ka mat kaba kyllaiñ bha bad donkam bad sngewthuh ïa ka jingktah ïa ka jinglaitluid ka mane Blei, ka hok ki rit paid bad ka jingma ïa ka jingngeit niam bad ruh ïa ka jaidbynriew riewlum.
U la ïathuh ba ban sngewthuh ïa kane ka mat na ka liang ka Youth Wing jong ka party kan sa pynlong ïa ka jingïakop ïatai nia hapdeng ki samla pule kolej kaban sa pynlong ha ka 12 tarik.
