Mawkyrwat, ‘Naitung, 02: Ka kynhun jong ka Search and Rescue Team jong ka Fire & Emergency Service, South West Khasi Hills District ka la ïoh ban leit pyllait ïa uwei briew uba la sah kut ha uwei u dewlynnong ha Wah Rilang, Mawranglang, South West Khasi Hills District.
Katkum ka jingpyntip napoh na ka F&EC, Mawkyrwat la ong ba kane ka jingjia ka la jia naduh ka 30 tarik u Jylliew, 2023 ha kaba u briew uba la sah kut u dei u bah Bekstar Lapang, 43 snem karta ha kaba ula sah kut ha utei u dewlynnong la kham katto katne kynta ha kaba um lait shuh ban kam lane kiew sha ryngkew na ka daw jong ka jingkiew kynsan jong ka um saw.
La ïathuh shuh shuh ba une u rangbah u la mih na ïing ban leit khwai na katei ka wah Rilang naduh ka por 5 baje mynstep bad ynda ula poi ha katei ka jaka ba u thmu ban khwai u la leit ha uta u dewlynnong bad tang shu poi ka la wan kynsan kynsan jong ka jingkiew jong ka um saw bad haba u la pyrshang ban phai na ka lynti ba u la leit um lait shuh ban kam na kata ka wah.
Namarkata, halor kane ka jingjia na ka liang ka F&EC, Mawkyrwat ka la ïoh jingpyntip ha ka por 5 baje janmiet bad mar mar ki la leit bad haba ki la poi ha wah Rilang ki la pyrshang katba lah ban thaw ki lad ki lynti ban ïoh ban pyllait na kata ka jaka ba u don hynrei ha kaba nyngkong kim shym la lah ban pynurlong hynrei da ka jingïaipyrshang jong ki tat haduh ka por 7:30 janmiet ki lah ïoh ban pyllait im ïa u na uta u dewlynnong ba u u la sah kut.
