Khlad u rangbah, mynsaw 8 ngut ba hap kali ha riat ba 200 phut ha surok Kenïong

Mawkyrwat, ‘Naitung, 02: Ha kawei na ki jingjia ba sngewsih kaba la jia ha ka sngi U Blei ha ka surok shwa ban poi sha shnong Keniong, South West Khasi Hills District kawei ka kali Alto K10 kaba don ïa u registration number ML04 B-1269 ka la noh sha riat kaba kynjang 200 phut eiei bad u Bah Kalbinus Nongbri na ka shnong Amarsang u la khladnoh.
Katkum ka tyllong khubor na ki Pulit la ong ba kane ka la jia ha ka por kumba 11:00 baje mynstep ha kaba kane ka kali ka mih na Nongstoiñ da ka jingthmu ban leit sha shnong Nongjri, South West Khasi Hills District hynrei ynda la poi ha ka shnong Kenïong ka la hap noh sha riat.
“Kane ka kali ka la hap hapoh riat kaba kynjang kumba 200 phut ei ei”, ong ka tyllong khubor bad ka jinghap jong ka kane ka kali ka dei namar ba ka thmu ban tam shakhmat ïa kawei ka trok bad ki don haduh 9 ngut kynthup ïa u nongñiah bad 5 ngut ki hep rit.
U Bah Kalbinus Nongbri na ka shnong Amarsang uba dei ruh u kpa jong ki san ngut ki hep rit bad kiba mynsaw ki kynthup ïa u Bah Khrawbor Nongsiang, 22 snem na ka shnong Mawlyngdep, West Khasi Hills District (nongñiah), u Bah Marius Nongbri, 70 snem na shnong Mawlyngdep uba dei u Paieid, ka kong Merilin Nongmin, 40 snem na shnong Amarsang, South West Khasi Hills District (kmie), i hep rit Dariti Nongmin, 4 snem ka rta, u hep rit Ribanson Nongmin 8 snem ka ta, u heprit Erick Nongmin 10 snem ka rta, i heprit Rikormary Nongmin 7 snem ka rta bad u heprit Micheal Nongmin 5 snem ka rta.
Ïa kine ki 8 kiba la mynsaw la pynkit noh sha Civil Hospital Mawkyrwat da ka kali EMRI 108.
Hadien katto katne por ba la buh hapoh Civil Hospital Mawkyrwat ïa kiba mynsaw jur la pynkynriah noh sha Shillong ban ïoh ïa ka jingsumar kaba kham thikna bad ïa ka met jong uba ïap la buh hapoh ka jaka buh met ïap hapoh Civil Hospital Mawkyrwat.