Shillong Naitung 02 : Ka IIM Shillong ha ka sngi Saitjaiñ kala ïasoi ïa ka Memorandum of Understanding (MoU) bad ka sorkar Nagaland na bynta ban pynïar ïa ka jinghikai bad ban kyntiew ïa ka pule puthi jong ki samla ka Nagaland ha ka Higher Education & Skill Development.
U Myntri ka tnad pule puthi ka sorkar Nagaland u TemjenImna Along, ula pynpaw ïa ka jingsngewhun ïa ka jingïatreilang hapdeng ka IIM Shillong bad ka sorkar jylla Nagaland bad ula ïaroh ïa ka jingshemphang bad ka jingtbit jong ka IIM bad kane kan wanrah ïa ka jingkylla ha ka pule puthi ha ki kyrdan kiba heh ha ka jylla Nagaland.
Ka thong jong kane ka jingïatreilang ka long ban wanrah ïa ka jingkylla ha kiba bun ki liang bad ban kyntiew shuh shuh ïa ka pule puthi bad ban pyntreikam ïa ka New Education Policy (NEP).
Ka Education Policy kaba thymmai la pynwandur ba kan lah ban sei ïa ki khynnah kiba tbit ban ai sha ki ïa ka jingpule ba paka bad ka sorkar jylla ruh kan ai ka jingkyrshan bad ka jingïatreilang na bynta ban long kaba jop.
Halor ka NEP 2020, u TemjenImna ula ong ba kadei ka jingïohi jngai bad ka jingpyntreikam ïa kane ka Polisi ka long kaba biang bha na bynta ka pule puthi. ïa ka NEP la wanrah na bynta ban pynwandur ïa ki khynnah ha ka liang ka jingpule.
Katba u Atul Kulkarni, dkhot jong ka BoG, IIM Shillong, ula pynthikna ba kane ka jaka pule kan ïaleh ban kyntiew ïa ki samla pule jong ka thaiñ shatei lam mihngi bad ula kyntu ïa ki samla pule ka thaiñ ba kin shim ïa ka kabu ban pule ha ka IIM ban pyntbit ïalade ha kiba bun ki laiñ jingpule.
U Director jong ka Higher Education Nagaland, u la pynpaw ïa ka jingsngewkmen ïa kane ka sienjam ha kaba kane ka dei ka sien kaba nyngkong eh ban ïatreilang bad kane ka jylla Nagaland.
Na ka liang jong u Nitin Sharma u dkhot jong ka BoG, IIMS, u la ïaroh ïa ka MOU ba la ïasoi namar kane kan plie lad ïa ki khynnah ka Nagaland ba kin don bynta hapoh kane ka shatri jong ka IIM khlem da donkam ban ïakhun ïa ka Common Admission Test (CAT).
