Na Lad Mawreng yn ïaid ka Western By-Pass, tyrwa u MLA Mylliem ban wanrah Police Station ha ka thaiñ

Shillong, Naitung 02: Ka dheng kali ba ka thain Upper Shillong ka ju mad baroh shi katta kan sa kham duna noh shen tang shu dep ban pyndep ïa ka jingshna ïa ka surok Western By-pass kaban ïaid na Lad Mawreng bad mih pat sha Lad Umsaw, Ri-bhoi District.
Kat kum ka jingïathuh u MLA Ka Mylliem uba ba dei ruh u Nongïalam ka Liang Pyrshah ha Ïing Dorbar Thaw Aiñ ka jylla u Bah Ronnie V Lyngdoh u la ïathuh ba ïakatei ka surok kaba ma u kum u MLA ka Mylliem bad ki paidbah ba ïaid ba ieng na ka surok NH-40 ki la angnud dik dik ban pyndep noh ïa katei ka surok kaba ka sorkar ka la dep ruh ban mang pisa na bynta ban ïaid shakhmat khnag ban lah ban weng ïa ka jingdheng kali kaba jur kaba jia ha man la kawei pa kawei ka sngi.
“Nga sngewnguh ïa ka sorkar jylla khamtam eh ïa u Symbud Myntri Rangbah ka jylla uba peit ïa ka PWD u Bah Prestone Tynsong uba la leh shitom ban pynïoh ïa ka mang pisa ba 600 klur tyngka na bynta ban tih ïa kane ka surok kaba thymmai kaban ym ïaid lyngba shuh ka sor Shillong bad kyrmen ba ka jingpyntrei kan sdang noh bad kan ïaid ruh shait shait khang ban lah ban pyndep kloi katba lah,” u la ong.
“Nga kyrpad ïa ki paidbah ba kin ai ka jingïatreilang bad ka sorkar khnang ba ka kam kan ïaid sted bad nga kyntu ïa ki trai jaka kiba kane ka surok kan ïaid lyngba ba kin ym pynkyllaiñ ïa ka jingai jaka bad ruh ïa ki shong kiba ka surok kan ïaid kin ai ka jingïatreilang kaba pura bad ka sorkar nalor kane nga kyrpad ïa ka sorkar ban pynsted noh ïa ka jingpyntrei ïa kane ka surok Fourlane kaba ka jingpyntrei ka la sahteng ha kiba bun ki bynta,” u la bynrap.
U la ïathuh ruh ba na ka liang jong u u ai khublei halor ka jingmynjur ka sorkar ban leh sorjamin na bynta ban tih ïa ka surok kaba na Sawmer sha Lawsohtun, kumjuh ka surok na Mawkhan sha Mawsing, ‘nga kyrmen ba ki kam kin ïaid stad khnang ba kan long ka jingmyntoi na bynta u paidbah ka Mylliem bad ki paidbah slonsar kiban pyndonkam ïa kane ka surok.
Ha kajuh ka por u Bah RV Lyngdoh u la ïathuh ruh ba u la dep ban kren bad u Myntri Rangbah ka jylla u Conrad K Sangma bad kumjuh bad u Symbud Myntri Rangbah ka jylla uba peit ïa ka tnat Kam Poh Iingna bynta ban pynïoh Police Station na bynta ka Mylliem ban pynsuk ïa ki paidbah ka constituency kiba baroh shi katta ki hap ban leit shaduh Jhalupara bad don ruh kiba ngat sha Mawngap wat haba ki don ki kam kiba rit eh kiba ïadei bad ki pulit.
“Na ka liang u Myntri Rangbah bad kumjuh u Symbud Myntri Rangbah bad wat u DGP u la kubur ba ka donkam ban don noh ka Police Station ha Mylliem bad ha ka jingïalang kaba dang shen haba nga ïakren ïa kane ka mat ki la pynpaw ba ka sorkar kam pat ju ïoh ïa kano kano ka jingtyrwa na bynta ban buh PS,” u la ong.
“Nga ïohi ba ka mih ha ki kot khubor ba hana ba yn plie ïa ka PS naduh ka term ba la dep jong u MLA barim ha Umshyrpi hynrei ha ka jingïakren na ka liang ka tnad ki ïathuh ba kim pat ïoh ïa kano kano ka jingthoh ban tyrwa buh PS,” u la jubab ha kaba ïadei bad ka jingkylli halor ka jingmih khubor naduh ki khyndiat snem ba mynshuwa ba la mut pynieng PS ha Umshyrpi.
Utei u MLA u la ïathuh ba u la dep ruh ban ïa kren bad ka Myntri ka Koit ka khiah Kong Ampareen Lyngdoh na ka bynta ban kyntiew kyrdan noh ïa ka Pomlum PHC sha ka CHC khnang ba kan long ka jingmyntoi ïa ki paidbah jong kane ka thaiñ.
“Nga la buh ka jingtyrwa ban kyntiew kyrdan noh ïa ka Pomlum PHC sha la CHC namar lada kyntiew kyrdan ki tiar ki tar ki la kham biang, ki jaka thiah bad ki doktor bad ki nos ruh ki la kham bud bad ki paidbah kim donkam shuh ban kiew shaduh sha sor ban shah surmar,” u la ong.
U la ïathuh ruh ba ka tnad DoNER jong ka sorkar India ka la mnjur ïa ka mang pisa kaba 33 klur na bynta ka Upper Shillong Water Supply.