Ki dawai ba bret sha Marten: “Dei ki dawai ba la sniew bym ïoh pyndonkam ha ka por COVID-19” pynshai ka DHS (MI)

Shillong, ‘Naitung, 02: Ka tnat ka Koit ka Khiah jong ka Sorkar Jylla ha ka sngi U Blei ka la pynshai ba ki dawai ba la bret ha Marten ha ka 29 tarik u bnai baladep ki dei kiba la kut por na ka daw ka jingbym ïoh ban pyndonkam na ka jingwan lynshop ka khlam jingpang COVID-19.
Ha u kyrwoh ba la phah da ka Director of Health Services (MI) ka la ong ba kine ki dawai ba la bret ha Marten, Mawïong, Shillong ki dei kiba la sniew.
Ïa kine ki dawai la pan katkum ka jingdawa jong ki district bapher bapher bad ki jaka sumar kiba don kylleng ka jylla. Kine ki dawai ki dei kiba ïoh bad sam sha ki jaka sumar kiba don ha ki District.
Ïa ki dawai ba la ïoh la buh ha Central Medica Store khnang ban sam haba don ki jingdawa ba kyrkieh.
Hynrei na ka daw ka jingwan lynshop jong ka jingpang khlam COVID-19, kine ki dawai la sahkut ha Central Medical Store bad kam shym la don shuh kano kano ka jingdawa.
“Ki dawai ki dei kiba la sniew na ka daw ka jingbym lah ban pyndonkam na ka jingwan lynshop ka jingpang khlam COVID-19. Ïa ki dawai kiba la sniew la donkam ban bret noh khnang ban pynkylluid ïa ka jaka buh dawai kaba wanrah ïa ka jingkhapngiah ynda la wanrah ban buh ïa ki dawai kiba thymmai,” la ong u kyrwoh na ka DHS (MI).
Ha kaba ïadei bad kane, u Pharmacist in-charge jong ka Central Medical Store Directorate Health Services (MI) u la pyntip lyngba ka shithi kaba Dated May 27, 2023 ba la donkam ban bret noh mardor ïa ki dawai ba la sniew, ong u kyrwoh.
Ïa ka kyrteng jong ki dawai ba la sniew la mynjur da ki bor ba dei peit.
U Assistant Drugs Controller, Directorate of Health Services (MI) lyngba ka shithi kaba Dated June 19, 2023 u la pyntip sha u Pharmacist in-charge jong ka Central Medicine Store ban bret noh ïa ki dawai kiba la sniew da ka jingaibor jong ki bor ba halor, la bynrap u kyrwoh.
U Pharmacist in-charge u la pyntip sha ki bor ba dei peit ha kaba ïadei bad ka jingbret noh ïa ki dawai ba la sniew ïa kaba la sdang naduh ka 29 tarik Jylliew, 2023, ong shuh shuh u kyrwoh.
Ha ka 29 tarik, Jylliew, 2023 da ki lak tylli ki dawai ba la sniew kiba kot da ki klur tyngka la theh sha jaka theh ñiut ha Marten.
Ka jingbret ïa ki dawai kiba la sniew ka la paw pyrthei hadien ba ki nongïalam jong ka Meghalaya Awaken Council Citizens (MACC) ki la buddien ïa ki kali jong ka Shillong Munipal Board (SMB) kiba kit ïa ki dawai kiba sniew, katba ki dang wan na ka thaiñ Polo.