Pynhap pyrda noh ka ophis u DSO ïaka District Level Inter School Subroto Cup FT ha madan Kurkalang ha Ri-Bhoi
Jop ka Mynken HSS haka U-14 bad U-17 ki shynrang, ka Saiden SS jong ki kynthei
Nongpoh Naitung 03: Hadien ka jingïaid shaphrang jong ka lympung ïalehkai phutbol ki khynnah skul bala tip kum ka District Level Inter School Subroto Cup Football Tournament mynta u snem, bala pynlong da ka ophis u District Sports Officer, Ri-Bhoi District, kaba la sdang naduh ka 27 tarik Jylliew, katei ka lympung kala poi noh sha kaba kut bala pynhap pyrda noh mynta ka sngi ka 3 tarik Naitung 2023 ha madan Kurkalang ha Ri-Bhoi.
Ïa katei ka lympung la wan ban pynhap pyrda da ka kong Kong P L Nonglait DSEO Ri-Bhoi District haka jingdon ryngkat u Bah S Pasleiñ DSP Ri-Bhoi, U Samla Ronald L Nonglait State Player, u ST Rympei Rangbah Shnong Lumdaitkhlah Bhoirymbong u Bah Boby L Nongbet District Sports Officer ka Ri-Bhoi, bad kiwei kiwei ki riew rangbah ka dong Ri-Bhoi.
Haba phai sha ka jingïakhun phainal ha madan ïalehkai kurkalang haka kyrdan U-14 hapdeng ka Mynken Christian Higher Secondary School, Bhoirymbhong pyrshah ïaka Umsning Presbyterian Secondary School, ka Mynken Christian Higher Secondary School kala lah ban pynliem noh ïaka Umsning Presbyterian da 2-0 kol.
Katba ha ka kyrdan U-17 ki kynthei ka jingïakhun kala long hapdeng ka Saiden Secondary School pyrshah ïaka Mynken Christian Higher Secondary School ka la pynliem ïa ka Saiden Secondary School da 1-0 kol.
Haba phai pat sha ka jingïalehkai jong ki kyrdan U-17 shynrang hadpeng ka Mynken Christian Higher Secondary School bad ka Nongjri Presbyterian Secondary School ka la jam sha kaba kut khlem da don ba lah ban pynkhih jar.
Ha kaba khadduh ka Mynken Christian Higher Secondary School kala ïoh ban rah ïa ka namlahduh lyngba ka Tie-Breaker hadien ba jop da 4-3 ïa ka Nongjri Presbyetrian SS ha ka jingïashut ïa ka penalty.