Shillong, Naitung 03: Hynnin ka Lah Sngi U Blei la ïoh ban pyntyllun biang ïa ka jingïalehkai jong ka lympung Shillong Sports Association’s Women’s League hapdeng ki kynhun ba hap hapoh ka Group A.
Ha kine ki ar tylli ki jingïakhun, la ïoh ban sakhi ba baroh ar kynhun kiba khlaiñbor na kane ka Group-A ki la pynjemkhnap ïa ki kynhun ba ïakhun pyrshah, kata ka Laitkor SC ka la pynbam kput ïa ka Kick Start Football Coaching Centre haduh 7-0 kol ha ka jingïalehkai kaba nyngkong, katba ka PFR Football Academy ka la jop da 4-1 kol ha ka jingïakhun kaba ar pyrshah ïa ka Lawei Smit SC.
Da kane ka namjop, baroh ar, kata ka Laitkor ryngkat bad ka PFR ki la ïoh ban kyntiew 9 point na ki lai sien ki jingïalehkai ba ladep, hynrei ka Laitkor ka la ïoh ban bat ïa ka kyrdan ba nyngkong lyngba ka jingïoh ban thep bun kol, kaba ïapher da +29 la +26.
Haba phai sha ka Laitkor, ïa ka namtam la ïoh ban khur da ka Iawanlang Nongbet kaba la khyrwit da ka hat trick (2′, 47′, 57′), katba kiwei ki kol la thep da ka Nisilia Majaw (7′), ka Tracy Rympei (13′) bad ka Iaraplang Nongrum (30′, 40′).
Haba phai sha kawei pat ka jingïakhun, watla ka Lawei ka la shah pynbam 4-1 kol ha kane ka jingïalehkai, hynrei patde ka la lah pat ban ïakhun pyneh triang kaba la pynlong ïa ka PFR ban mad ïa ka jingïalehkai kaba jwat.
Ka Betsheba Kharsyntiew ka la ïoh ban pynïakhlad ïa ka jingïakhaid ha ka minit ba 10 lyngba ka kol na ka free-kick shuwa ba ka Ibashisha Khongwet kan thep ïa ka kol kaba ar ha ka 25th minit lyngba ka penalty. Hadien kane, ka Khongwet ka laïoh ban thep sa ïa ka kol kaba ar tang hadien saw minit shuwa ba ka Ridalin Suting (33′) kan thep ïa ka kol ban lamkhmat da 4-0 ha ka kylla step.
Wat hadien ba ka la ïoh shibun ki kabu, hynrei ka PFR kam shym la lah shuh ban pynkhihjar ha ka kylla kaba ar, katba na ka liang jong ka Lawei ka la pyrshang katlah katïai ban pynphai, bad dei ha ka free kick ba la shut da ka B Nongrum kaba leit dei sha ka bak jong ka PFR shuwa ban rung shapoh kol kaba la pynïoh ïa ka Lawei shi kol ha kane ka jingïalehkai.
Lashai ka sngi, ka lahduh jong u snem ba ladep, kata ka Mawlai SC kan aireng pyrshah ïa ka Synroplang 77 2:30pm bud sa ka Lumparing pyrshah ïa ka Maw U-tieng 4:15pm. Kiba dei na ka thup jong ka Group-B.
