Sha ïing u MLA Nongstoiñ Constituency leit tur ka kynhun jong ka VPP

‘Haba um kren eiei ka paw ba um don jingkitkhlieh’

0

Nongstoiñ, Jymmang, 23: Katba u President rangbah jong ka party VPP Bah Ardent Miller Basaïawmoit u la sdang ïa ka jingshong shah thngan hajann Secretariat, ka kynhun na ka seng VPP Nongstoiñ ryngkat ki jingthoh bapher bapher ha ki plakad, ki la leit ban shong kyllaiñ myngor hakhmat ka khyrdop ïing u bah Gabriel Wahlang MLA jong ka Nongstoiñ Constituency.
Katei ka kynhun kaba la poi ha ïing utei u nongmihkhmat ha ka por 3 baje ei ei ha ka shnong Pyndengrei, ka la ong ba katei ka jingleh jong ki ka long shi bynta ban pynbor ïa u nongmihkhmat jong ka thaiñ, ba un kren ei ei bad ban kyrshan ïa ka jingïakhih jong ka seng VPP hapoh ka jingïalam jong u bah Ardent Miller Basaïawmoit president rangbah ka seng VPP.
Ïa katei ka kynhun la lamkhmat da u bah Davis Franki Wahlang Joint Secretary ka seng Voice of the People’s Party Nongstoiñ Pyllun. Ha ka jingïakren bad ki nongthoh khubor utei u secretary u la ong ba ha ka jingshisha u bah Gabriel Wahlang kum u Nongmihkhmat u lah dei ban kren ha ïing dorbar thaw aiñ halor ka mat kaba kongsan ba ka jaidbynriew ka ïakhun mynta ban ïoh, kata ka dei halor ka jingpynkylla ïa ka Reservation Policy.
“Haba um kren ei ei ka paw ba um don ka jingkitkhlieh ïa ka lawei ki khun samla jong ka jaidbynriew. Kane ka dang dei tang ka dak kaba rit jong jingsdang ka jingïakhih bad yn leh kham tyngeh nangne shakhmat”, u la ong.

Leave A Reply

Your email address will not be published.