Pynjari kyndon 144 CrPc u DC ba ïap ki sñiang na ka African Swine Flu

0

Nongstoiñ, Jymmang, 23: Ka dei ka sien ba nyngkong ba ha West Khasi Hills la lap ba ka la don ka jingïap jong ki sñiang na ka African swine flu ha ka shnong Tiehsaw kaba jngai tang shi kilomitar napdeng sor Nongstoiñ.
Katkum ka jingpyntip jong u bah Garod LSN Dykes Deputy Commissioner ka West Khasi Hills, la ong ba hadien ba la ïoh jingtip ba ka don ka jingïap jong ki sñiang ha ka shnong Tiehsaw, u District A.H Veterinary Officer u la phah ïa ki nongtrei na ka ophis jong u ban leit leh ïa ka test ban lap ïa ka daw jong ka jingïap. Hadien ba la dep leh ïa ka test la lap ba ka jingïap jong ki sñiang ka dei na ka African swine flu.
Kumta hadien ba u DC u la ïoh pdiang ïa ka kaiphod na u District A.H Veterinary Officer, u la pynbna paitbah ba katkum ka bor ba la pynkup ha u lyngba ki kyndon aiñ, u la pynjari da ka kyndon 144 Crpc hapoh ka area kaba shi kilomitar na ka shnong Tiehsaw, namar katei ka African swine flu ka lah ban saphriang haduh 1 kilomitar na ka jaka ba jia.
Nalor kata la mana ruh ba ym bit ban pynpoi sñiang, ki tiar ki tar, ka doh, ki kynja jingbam ka bynta ki jingri ki dawai na ka ophis Veterinary, kiba la pyndonkam ha katei ka jaka ba shah ktah. U la bthah ruh ba ki nongri sñiang ki dei ban sumar bha bad ban leh khuid katkum ki jinghikai ba ki la ïoh bad kim bit ban shah ïa kino kino ki briew ba kin leit rung sha ki jaka ri sñiang.
La mana ruh ba ki paitbah kim bit ban leit rung klumar ha ki jaka ba la shah ktah ha katei ka khlam. La mana bad pyrkhing bha ba kino kino kiba ri sñiang kin leit rung sha ki jaka ba la mana. Ïa ki kali la shah ba kin mih na ki jaka ba la mana tang ynda la dep eksamin bad sait khuid bha.
La mana ruh ba yn ym shah ïano ïano ban rah ïa ki sñiang shawei pat la ki dei kiba im ne kiba la suba ba ki la shah ktah ha katei ka khlam. Katei ka hukum kan treikam naduh ba la pymih haduh ban da pynbna da kumwei pat.
La bthah ruh ba ki paitbah ki dei ban phikir bha ha ka ïaid ka ïeng bad ka rung ka mih ha ki jaka ba la mana, namar katei ka African swine flu ka dei ka jingpang kaba lah ban ktah ruh wat ïa ka jingkoit jingkhiah jong ki briew.

Leave A Reply

Your email address will not be published.