Jowai, Jymmang, 23: Ka Khasi Students Union (KSU) War Jaiñtia Circle ha ka sngi Baar hapoh ka jingïalam jong u General Secretary u Samla Lurman B. Talang, ki la ïakynduh ïa u Chief Executive Officer (CEO) jong ka Land Port Authority of India (LPAI) kaba dei tnat treikam bathymmai jong ka Sorkar India ha Tamabil, West Jaiñtia Hills District.
Ka Seng ha kane ka sngi ka la dawa ba dei ban thep kam nyngkong da ki briew jong kane ka thaiñ namarba ki don shibun ki samla bym ïohkam ïohjam kiba na kane ka thaiñ Riwar kiba dei hok ban ïoh bad kiba la tbit bad kiba la pyndep ïa ki jingpule jong ki.
Ka jingthmu jong ka seng hi ka long ban khanglad ïa kiba nabar ban knieh ïa ka hok ki trai ri trai muluk ha ka liang ka thung kam thung jam.
Na ka liang jong u CEO ba dei peit ïa kane ka kam ula kular ha ka seng ba daleilei ruh un ym pdiang ïa ki briew kiba nabar bad un thung shwa ïa da ki briew kiba la tbit ha ki kam ba ïadei hapoh ka Land Port Authority of India (LPAI).
Ka Seng ka la dawa ba ki briew kiba nabar kiba dei ki Technician kiba ym lah da ki briew jong ngi ban leh, ki kot ki sla jong ki, ki dei ban biang katkum ka jinghukum na ki ophis ba dei peit ïa ki kot ki sla.
Ka seng kan sa leit mih na ka por sha ka por ban peit bniah ïa kane ka kam khnang ba samla Khsi kin lah ban ïohkam ïohjam ha kane ka LPAI ba dang shu pynkha thymmai kaba don ha ka thaiñ jong ki bad pynmyntoi ia ki Samla kane ka thaiñ.
