Lahduh Pyndenkynshliah bad ka Nineset ha ka District Level U-12 Football Tournament
Mawkyrwat, Jymmang 23: Ka lympung ïalehkai kynjatbol ba la tip kum ka Chief Minister’s District Level Under-12 Years Football Tournament 2023 ba la pynïaid da ka ophis jong u District Sports Officer, South West Khasi Hills District ka la poi noh sha kaba kut ha kaba ka Pyndenkynshliah Lower Primary & Upper Primary School jong ki shynrang bad ka Nineset Secondary School, Jakrem jong ki kynthei ki la long ki lahduh ba la pynlong ïa ka ha madan Saitsnad, Mawlangwir, South West Khasi Hills District.
Ha ka jingïalehkai, ka phainal ba nyngkong ka dei jong ki khynnah kynthei ba 12 snem kata hapdeng ka Nineset Secondary School pyrshah ïa ka Rising Secondary School, Sohkhyllam ka la long ka jingïalehkai kaba itynnad ha kaba ki ‘thei ïalehkai ki la ïoh ban pyni ïa la ki sap ki phong jong ki ban ïa pashad bol bad kumjuh ruh ban ïa pyrshah ban ïa pynkhih jar ryngkat ki jingthmu ban pynpoi ïa la ka kynhun ha ka thong jong ka jingjop.
Haba phai ha ka jingïoh ban ïa thep kol ka Nineset Secondary School ka la ïoh ban thep tang shi kol pyrshah ïa ka Rising Secondary School ha ka minit kaba 3 na ka Badaphun Lyngkhoi bad da kane ka shi kol ka Nineset SS, Jakrem ka la rah syndon ïa ka nam lahduh.
Ha ka jingïalehkai jong ki khynnah shynrang ba 12 snem ka Pyndenkynshliah Lower & Upper Primary School ka la pynliem noh pyrshah ïa ka Rangjadong Sports Club da 4 – 3 kol lyngba ka Tie Breaker namar ha ka Regular Time ki la ïoh ban ïa thep mar kawei ka kol kata na u Joel Edmun Iawphniaw ha ka minit kaba 18 jong ka Rangjadong SC bad na u Edestar Nongsiej ha ka minit kaba 42 jong ka Pyndenkynshliah LP&UPS.
Ïa ka Chief Minister’s District Level Under-12 Years Football Tournament 2023 kaba dei ka lympung ïalehkai kynjatbol jong ki khynnah ba 12 snem la wan ban pynhap pyrda noh da u bah D. Mawleiñ, MPS, Deputy Superintendent of Police, South West Khasi Hills District ryngkat ka jingïadonlang u bah Damang Syngkon, District Sports Officer, South West Khasi Hills District, u bah S.K. Budnah, President ka Mawlangwir Sports Club, u bah P. Wanniang, Secretary ka MDSA lem bad kiwei de ki ‘riew rangbah bad kumjuh ruh ki nonghikai skul bad ki nongïalam jong ki sports club.