U Ngap un duh jait bad ngin ym ïohi shuh lada ym don ki soh, ki syntiew: Renikton

Mawkyrwat, Jymmang, 23: Ka ophis jong u District Horticulture Officer, South West Khasi Hills District, Mawkyrwat ka la pynlong ïa Exhibition-cum-Crop Competition ryngkat ka jingrakhe ïa ka World Bee Day ha madan jong ka Mawkyrwat Presbyterian kaba don hajan jong ka Mawkyrwat Community Hall ha kaba u bah Renikton Lyngdoh Tongkhar, uba long MLA ka Mawkyrwat Constituency ula long kum u kongsan katba u bah Carness Sohshang, u MDC ka Mawkyrwat Constituency kum u symbud kongsan.
Ha kane ka prokram la wan ïashimbynta lang da ki nongrep kiba don sawdong kane ka dong ka thaiñ Mawkyrwat ha ryngkat ruh ka jingpyn-i nam bad ka jingdie ïa ka ngap, ki soh, ki jhur bad ki syntiew.
U bah Renikton Lyngdoh Tongkhar haba kren ha kane ka jingïalang u la ai mynsiem ïa ki paid nongrep ban nang pynheh pynïar shuh shuh ïa ka rep ka riang bad ka mynsiem ban don ka jingsngewsarong ha la ka jong ka kam, kam pher la ka rit ne khraw ka dei ban rung ha ka jingmut jingpyrkhat jong ki. Haba phai pat sha kane ka jingrakhe kaba ïadei bad kane ka sngi u la pynkynmaw ba ka jingdon jong ki ngap, u la ong ba ka ïarap ban pynroi pynkha ïa ka thung ka tep bad lada ymdon jingthung jingtep kum ki soh ki syntiew khlem pep u ngap un duh jaid bad ngin nym ïohi shuh ïa ki.
Ha kajuh ka por u la ai jingmut ïa ki nongtrei jong kane ka thaiñ ba kin peit thuh bad khmih bniah ba kiba kumno ki soh, ki syntiew ba u ngap u sngewtynnad bad juh khnang ban lah ban pynroi ïa ka rep ka riang bad ban lah ban pynmih bun ka ngap. U la pynpaw ïa ka jingsngewkmen ban ïohi ba kiba bun ki nongrep ki la nangkiew ha ka jingim namar ka kam rep kaba la lah ban kyrshan ïa ka ïing ka sem jong ki.
Namarkata, u la pynshlur ïa ki ban pyrshang ban rep da ka sboh kaba khlem ai dawai namar ha kine ki sngi kiba mynta ki briew ki kham ïa wad ïa ki soh ne jhur kiba khlem ai dawai wat lada dei ban thied ha ka dor kaba rem. U la ai jingmut ïa ki ban wad ki lad ki lynti ha kaba lah ban thung ïa ki mar rep kham bun kum u slasha bad kiwei pat ki mar rep kat kum ka jinglong ka jaka kiba lah ban ai jingmyntoi shibun ïa u nongrep. U la kyntu namarkata, ïa ki paidbah ban ïa thied lem ïa ki mar ba pynmih ki nongrep namar ki don ka bynta kaba khraw ha ka ban ïarap ïa ki nongrep khnang ba kin ïoh pynmih kham bun da kaba pynkut ba khlem u nongrep ngin ym lah ban im namar dei u nongrep uba pynbiang ka bam ka dih ïa ngi.
U bah Carness Sohshang haba kren ha kane ka jingïalang u la ong ba ki nongrep ki dei u budlum jong ka ïoh ka kot kumta u la ïaroh ïa kane ka department kaba la trei shitom na ka bynta ban kyntiew ïa u nongrep. Ha ka juh ka por u la ai mynsiem ïa ki nongrep ba kin pyntrei hok ryngkat ka trei shitom lym kumta ki skhim kiba ka sorkar ka la mang na ka bynta jong ki lyngba kane ka department kin sa shu bijai ei. U la kyrpad ïa u nongmihkhmat ryngkat ka department ban kin shimkhia da kaba wad ki lynti hato ka sorkar ka don mo ki lad ban siew bai lut ksan ïa ki nongrep lada ka wan ka jingjulor ne ka jingshah lynshop ha ki bor ka mariang khnang ba u nongrep un ym duh ei.
U la ban jur halor ka jingdonkam ban don lypa barobor ïa ka ngap ha ïing namar ka ngap ka dei ka dawai bah kaba lah ban ïarap ïa kiba bun ki jingpang. U la pynshlur namarkata, shim ïa ka kam ban ri ngap namar ban ri ngap kam da donkam ban da lut than ne shim than ïa ka por bad ka bor. U la ai jingmut ruh ïa ki bor ba dei khmih ba kin wad lad da kumno ban ïada ïa u ngap na kaba shah thang ne pynïap pathar khnang ba u ngap un ym duh jaid namar u ngap u ïarap ban pynroi pynkha ïa ka thung ka tep.
Ha kane ka sngi la ïoh ruh ïa ka jingkren na u bah T. Shangdiar, Master Bee Trainer jong ka ka Nangkiew Irat Cluster uba la ïathuh halor ka jingjop bad ka jingïaid lynti jong u ha ka kam ri ngap. La ïoh ruh ïa ka jingkren na ka kong Ranjeeta Syiemlieh, Progressive Farmer bad na u bah Adelbert Kharlyngdoh, Development Horticulture Officer, ATMA.
Shuh shuh la ïoh ruh ka jingsam ïa ki syrnod bad ki khusnam sha ki nongjop ha ki jingïakop bapher bapher.
Kham ha shwa u bah D. Syiemiong, District Horticulture Officer, South West Khasi Hills District u la ai ïa ka jingkren pdiang sngewbha katba u bah M.R. Marak, Assistant Horticulture Officer, South West Khasi Hills District u la ai ïa ki kyntien khublei.