Nongpoh, Ïaiong 08: Kum kawei na ka thong jong ka seng ban pynkhlaiñ ïa ka jingshakri na ka bynta ka eh ka shon ki paidbah bad ruh ban kyntiew ïa ka bha ka miat bad ka roi ka par, ki heh nongïalam ka segn Hynñiewtrep Achik National Movement (HANM) seng kmie mynta ka sngi ki la hiar sha ka Shnong Umjarasi na ka bynta ban pynskhem ïa ki nongkitkam ba pura ka Hynñiewtrep Achik National Movement ha Ri Bhoi District.
Ïa kine ki nongïalam ba thymmai ka HANM, Ri Bhoi District la pynskhem mynta ka sngi ha ka jingïalang kaba la long ha Ïing Dorbar ka Shnong Umjarasi, ha kaba u Bah Lamphrang Kharbani kum u President ba rangbah ka seng u la shim ïa ka bynta ban pynskhem ïa kine ki nongïalam ba pura ka HANM Ri Bhoi District.
Kine ki nongïalam ba thymmai ka HANM, Ri Bhoi District kiba la shim ïa ka lyngkor na ka bynta ban ai ka jingshakri ïa ki paidbah ka Ri Bhoi ki kynthup ïa u President ba la jied ïa u Bah Ajit Makri, u Bah Dianghun Pnar kum u General Secretary bad kynthup kiwei kiwei ki nongïalam bad ki dkhot jong kane ka seng HANM ha Ri Bhoi District.
Kum u nongïalam ba rangbah ka seng HANM Sengkmie, u Bah Lamphrang Kharbani, hadien ka jingpynskhem bad ka jingpynbam smai ïa kine ki nongïalam katkum ki riti synshar ka seng, u la pynbud ruh da ki kyntien ban ai jingsneng jingkraw ïa kine ki nongïalam ba thymmai ba kin shim ïa kata ka jingkitkhlieh ban shakri hok ïa ka them Ri Bhoi kumba la pynkupbor da ka seng ba kin long kita ki nongïalam ki trei hok na ka bynta ki paidbah.
“ Ka seng ka kmen ruh ba ki khun samla ki kloi ban wan pynïasoh sha ka seng kum kita ki shipai ka jaid byrniew, namar ka nongrim ka seng ka long ban peitngor bad ban ai kata ka jingïada na ka bynta ki mat ki jura jong ka jaid bynriew” ong u Bah Lamphrang Kharbani.
Namarkata, kum u nongïalam u la kyntu ruh kine ki nongïalam ym ba kin wan sha ka seng na ka bynta ka jingmyntoi shimet ne ka jingmyntoi jong ka ïing ka sem, hynrei ka jingdon jongki hapoh ka seng ka long ban long kita ki nongïalam kiba kloi ban trei na ka bynta ka daw bah jong ka ri bad ka Jaid Bynriew, u la bynrap.
