Sah lyngngoh ka MYF ba shu tei mot ka sorkar ïa ka jaka sumar longkmie bad khunlung ha WKH

Nongstoiñ, Ïaïong, 8:Ka seng Meghalaya Youth Federation sengkmie hapoh ka jingïalam jong u Bah Hamar Lyngkhoi kum u President bad samla Pliebok Hoojon President jong ka Nongstoiñ Circle, ki la leit ban ïakynduh ïa ka District Medical & Health Officer (DM&HO) jong ka West Khasi Hills, ban pan jingshai halor ka jingpynslem jong ka tnad ka koit ka khiah ban plie noh ïa ka Maternity & Child Hospital, ka ban ai jingsumar kyrpang na ka bynta ki longkmie ba ar met bad ki khunlung.
U Bah President ka seng u Bah Hamar Lyngkhoi, u la ong ba naduh ar snem mynshuwa la dep ban tei ïa ka ïing na ka bynta katei ka jaka sumar bad la dep ruh ban thung ïa ki nongtrei ha katei ka jaka. Hynrei, haduh mynta ka sorkar lyngba ka tnad ka koit ka khiah, kam pat lah ban plie ïa ka bad kane ka pyni ba ka sorkar ka shu wan tei mot ym ba ka wan buh ïa ka jaka sumar ban ai jingshakri ia ki paidbah.
Namarkata, ka seng ka dawa ïa ka sorkar ba ka dei ban plie noh mardor ïa katei ka jaka sumar, na ka bynta ban ai jingshakri kaba pura ïa kito kiba donkam ïa ki jingshah sumar ba kyrkieh, khamtam ïa ki khunlung khynnah bad longkmie ba ar met.
Kumjuh ruh na ka liang ki nongïalam jong ka seng WKSU hapoh ka jingïalam jong u President Bah D.Sun, ki la pynpaw halor ka mat ban plie noh ïa ka Maternity Children Hospital (MCH) ha Nongstoiñ bad ban mang tyngka noh na ka bynta ki post bapher bapher kiba dei ban don ha katei ka jaka sumar.
Nalor nangta ka seng ka la pynpaw ruh halor ka jingdonkam ban sdang ban pyntrei noh ïa ka skul ANM kaba dei ban buh ha Mawkyrwat South West Khasi Hills, kumba ka sorkar hi ka la pynbna naduh ba sdang ban tei ia ka ha Laitlawsang.
U khlieh duh jong ka DHS Health Engineering Wing, u la ong ruh ba donkam ban phah sanction noh ïa ki post bapher bapher lada dei ïa ka MCH bad ANM da ka tnad ka koit ka khiah kaba don ha Nongstoiñ bad Mawkyrwat, khnang ban lah ban plie noh kham kloi ïa kitei ki tyllong ai jinghikai jingnang jingstad bad ruh ïa ka jingai jingsumar ïa ki khunlung ha katei ka thaiñ.
Haba ki nongïalam ki la leit ban ïakynduh ïa ka DM&HO Nongstoiñ, na ka liang jong I, I la ong ba ban sanction ïa ki post bapher ka dang ap ïa ka rai jong ka sorkar jylla lyngba u myntri ka tnad ka koit ka khiah, ba un ai jingbit ïa ka tnad ka koit ka khiah ban leh ïa kaba donkam na ka bynta thoh noh bad ban mang noh ïa ki kam kiba lait na ka bynta ka MCH.
Ka seng ka kyrpad na ka sorkar jylla lyngba u myntri ka tnad ka koit ka khiah, ban aiti lane ai bor ha ki bor ba dei peit ïa ka MCH ha Nongstoiñ, ba ïa ka Hospital kha bad sumar khunlung ym dei ban aiti ne ban phah pynïaid ha kino ki kynhun ïoh kan dkoh ha ki rukom treikam.
Hynrei, dei ban pynneh beit ban ai bor ïa ka tnad jong ka koit jong ka jylla bad jong kane ka thaiñ hi khnang ban ïaid beit ïaid ryntih ha ki rukom treikam. Nangta dei ban mang tyngka noh bad sdang pyntrei noh ruh na ka bynta ka ANM kaba dei ban buh ha Mawkyrwat.