Shano shu jah rngai ka jingthmu pyntrei ïa ka khyrdop talasi mynder ha Athiabari, West Khasi Hills?

Nongstoiñ, Ïaïong, 8: Ka jingthmu jong ka sorkar ban tei ïa ki khyrdop talasi mynder (entry & exit point) ha Athiabari West Khasi Hills, ka la kynjoh mynta la palat hynriew snem, hynrei na ka liang ka sorkar kam pat lah ban pynurlong ïa katei ka jingthmu.
Halor kane ka mat, lah ban pynkynmaw ba ki 13 tylli ki sengbhalang hapoh ka jylla naduh ba ka sorkar Meghjalaya United Progressive Alliance (MUA) I&II ba la ïalam da ka Congress bad ba u Dr.Mukul Sangma u long kum u Myntri Rangbah, ki la pynlong ka jingïakhih kaba jur ban dawa ba ka sorkar kan pyntreikam noh ïa ka Inner Line Permit (ILP).
Ban pynsangeh ïa ka jingbitar ki Sengbhalang kiba ïakhih, u Dr Mukul bad ka sorkar ki la pynthame da kumne da kumtai bad kular ba ha ka jaka jong ka Inner Line Permit, kan pyntreikam noh da ka Meghalaya Residential & Safety Act (MRSSA) bad ban pynïeng da ki Entry bad Exit point kiba dei ki khyrdop ban talasi mynder ban khang lad ïa ka jingwan rung kyrthep jong ki hapoh ka jylla.
Lyngba katei ka jingthmu, ka sorkar ka la pyrshang ban peit ïa ki jaka kiba bit ban pynïeng ïa kitei ki khyrdop, ha kaba ha West Khasi Hills la jied ïa ka Athiabari kum kawei na ki jaka ban buh ia ka khyrdop talasi mynder.
Ym tang katta hadien bad la jied ïa katei ka jaka, ka sorkar ka la phah ïa ki briew jong ka ban leit ïakynduh ïa ki paidbah nongshong shnong ka thaiñ la ki mynjur ne em ban buh khyrdop talasi mynder ha katei ka jaka. Ha ka jingleit jong kitei ki heh sorkar ki paidbah nongshong shnong ka thaiñ, ki la mynjur bad ym shym la don kano kano ka jingpyrshah.
Ka sorkar ruh ka la phah jurip haduh arsien bad la ïoh ruh ïa ka jaka kaba bit ba biang bha kaba don ha pdeng jong ka Khasi Hils Autonomous District Council Forest Plantation. Kaba lyngngoh ka long ba wat la ka sorkar ka la ïoh ïa katei ka jaka kaba ba biang bha ban tei ïa ka khyrdop talasi mynder, hynrei haduh mynta ym pat ïohi dak ei ei ruh em ba kan sdang ban pyntreikam.
Ka jingsuki jong ka sorkar ban tei ïa katei ka khyrdop talasi mynder ha katei ka jaka ka la pynlyngngoh haduh katta katta ym tang ïa ki sengbalang, hynrei wat ïa ki paidbah nongshong shnong jong ka District baroh kawei.
Na ka liang ki nongïalam jong ki sengbhalang bad ki paidbah ka District ki la kyntu ïa ka sorkar ba ka dei ban pyntreikam noh kloi ïa katei ka jingthmu, khnang ba ki paidbah kin ym sah ha ka lyngngoh.
Kum ban shu pynkynmaw ba na ka liang ka KSU Mawshynrut Circle ka la kyntur na ka por sha ka por bad pynkynmaw ïa ka sorkar jylla, ba ka dei ban tei noh ïa ka khyrdop talasi mynder ha Athiabari ba hap hapoh Mawshynrut Civil Sub Division, West Khasi Hills.
Ki nongïalam jong ka seng ki la pynpaw ba ka long kaba la donkam kyrkieh ban buh noh ïa ka Entry & Exit Point ha katei ka jaka, ban teh lakam ïa ka jingrung lait lan jong ki mynder hapoh ka jylla. Ka Athiabari ka dei ka lynti bah kaba ki mynder ki ju pyndonkam ban rung hapoh ka jylla. Ki dkhot nongialam jong ka seng, ki lap ba ki don ki mynder ri kiba wan naduh Nepal ne Bangladesh lyngba ka Assam, ban wan trei bylla treikam dewiong ha ka thaiñ Shallang bad ha kiwei kiwei ki jaka.
Ka long kaba sngew lyngngoh ba balei ka sorkar jylla ka leh klet bad pynslem ban tei ïa katei ka khyrdop talasi mynder ha Athiabari. Ha ka jingshisha ka shnong Athiabari bad ki shnong ba marjan kum ka Aradonga bad Umsaitwait, ha ka jingïalang ba la long ha ka 24 tarik Kyllalyngkot 2017.
Nangta ha ka 1 tarik Rymphang 2017 lem bad ka Public hearing ba la pynlong ha ka 24 tarik Lber 2017, ha ka jingdon ryngkat jong u Bah M.B.Tongper EAC Mawshynrut block, ki sordar, ki nokma, ki dkhot na ka tnad revenue Nongstoiñ, ka Social Impact Assessment team (SIA) na ka Meghalaya Institute of Governance ha ryngkat ki trai khyndew, ki seng longkmie bad u sirdar jong ka Hima Jyrngam, ki la pdiang sngewbha ïa ka jingthmu jong ka sorkar jylla ban buh ïa katei ka khyrdop talasi mynder ha Athiabari.
Ka jaka ba thmu buh ïa katei ka khyrdop ka dei ka khyndew ba la kam trai da ka District Council ha ka jingheh kaba 28728.88 square meters. Na ka liang ka District council ruh katkum ka shithi No.DC.RAF/XII/406/2015/5349 kaba Dated Shillong, the 6th September 2016 lyngba u joint secretary to the Executive Committee Khasi Hills Autonomous District Council Shillong, ka la mynjur ban ai ïa katei ka jaka sha ka sorkar jylla ban tei ïa ka khyrdop talasi mynder ha Athiabari. Sngewsih pat ba haduh mynta ym pat I don dak ei ei ruh em ba ka sorkar kan sdang noh ïa katei ka kam.
Na ka liang ka Khasi Student’s Union West Khasi Hills District Unit ruh, ka la leit ïakynduh ïa u Deputy Commissioner West Khasi Hills District, ha kaba ïa dei bad ka jingthmu ban tei ïa ka khyrdop talasi mynder ha ka shnong Athiabari Mawshynrut Civil Sub Division.
Ha ka jingïakynduh ïa u D.C barim Bah T.Lyngwa, u la ïathuh ba ïa ka bai jaka la dep siew lut ha ka dor kaba 97 lak tyngka bad ka jingheh kaba 8 acre tam kaba dei ruh ka jaka jong ka Khasi Hills Autonomous District Council, ha kaba la thmu ban tei ïa katei ka Entry Exit Point. U D.C u la ïathuh ruh ba ïa ka Plan bad Estimate lah dep phah ha ka tnad P.W.D Building.
Na ka liang ka Seng hadien ka jingïakren bad ka tnad P.W.D Building, u Engineer jong katei ka tnad u la ïathuh ba ki dang pynkhreh shait shait ïa katei ka Plan bad Estimate bad la kyrmen ba hashwa ban kut u bnai Jylliew, kin lah ban pyndep ban phah noh sha ka tnad Planning bad Finance Department jong ka Jylla. Pynban ka long kaba lyngngoh haduh katta katta ba haduh mynta ruh ym pat sdang.